MGA senior citizen, persons with disabilities ug bisan kinsa nga dili buot nga makasinati og grabe nga kaigang o kainit diha sa ilang pagbotar karong Lunes nga piniliay, ang gitambagan sa Philippine Atmospheric, Geophysical and Astronomical Services Administration (Pagasa) Visayas nga mas maayo mosayo.
Kay karong Lunes, Mayo 13, gilantawan nga moabot sa 44 degrees celsius ang matagamtaman nga kainiton kon heat index gani matud ni Engr. Al Quiblat, ang chief sa Pagasa Visayas, nga posible mosaka pa kini ngadto sa 47 degrees celsius, ilabi na sa crowded kon nagtapok ang mga tawo.
Sa Biyernes ug Sabado, Mayo 10 ug 11, makasinati pa og mga katag nga pag-ulan tungod sa Intertropic convergence Zone, diin usa sa anaa niini ang Low Pressure Area nga nakasulod sa nasud Huwebes sa hapon, Mayo 9, sa silangang habig sa Mindanao.
Apan gamay gihapon ang kahigayunan nga mahimo nga bagyo ug posible pa gani nga mahilis sa mga mosunod nga 24 ngadto sa 36 ka oras.
Laing tambag sa Pagasa nga angay ang pagdala og payong, ilabi na sa hapin karong Lunes, kay gawas sa grabeng kainit, atol sa kahapunon posibleng anaa gihapon ang kalit nga pag-uwan tungod sa localized thunderstorm.
Siguruon usab nag kanunay nga pag-inum og tubig.