DILI lamang unta sa simpatiya ang himuon nga pagbotar sa katawhan.
Kini ang pamahayag ni Gobernador Bambi Emano human gikumpirma sa ilang pamilya nga si Konsehal Nadya Emano-Elipe ang mohulip sa kandidatora sa ilang namatay nga amahan kanhi Mayor Vicente Emano pagka-bise mayor sa siyudad sa Cagayan de Oro.
Matud ni Bambi nga kwalipikado si Nadya sa maong posisyon ug makatabang kini og dako ug makapanerbisyo.
Dugang ni Bambi nga nahimong konsehala hangtod karon sa iyang katapusang termino si Nadya ug usa ka abugada nga mangulo diha sa sesyon.
Pormal nga gikumpirma ni Bambi atol sa press conference nga gipahigayon kagahapon sa buntag atol sa haya ni Dongkoy diha sa Sta. Cecila, Gusa, ning siyudad sa Cagayan de Oro ang paghulip substitution nga mahitabo alang sa eleksyon karon Mayo 13.
Si Bambi, kinsa emosyonal nga mideklarar niini, niingon nga naestoryahan kini sa ilang pamilya ug nahukman nga ipadayon ang tinguha kaniadto sa ilang amahan nga makapangalagad sa katawhan.
Si Nadya, kinsa nagsige og hilak, niingon nga wala niya gidahom nga mopanaw iyang amahan ug gani wala sa iyang huna-huna nga modagan sa piliay tungod kay bout niyang ipaabot iyang suporta sa iyang amahan, kang Governor Bambi ug kapikas nga si Board Prexy Elipe kinsa nagpapili pagka bise gobernador sa Misamis Oriental.
"Dili ko gusto nga pasagdan ang partido nga giubanan sa akong papa ug lisod ug sakit alang kanamo sab nga sila talikdan," matud ni Nadya.
Tungod sab kay gamay nalang ang adlaw ug piliay na bout niining ipaabot sa katawhan nga sa katapusang higayon mabasa ug mabotaran sa katawhan ang pangalan gihapon sa iyang amahan.