BABAG ug dili mahimong kaabag.
Kini ang pamahayag ni Mayor Oscar Moreno kong ugaling si Konsehal Nadya Elipe-Emano ang mohulip sa namatay niini nga amahan nga si kanhi Mayor Vicente Emano pagkabise-mayor karong Mayo 13 nga eleksyon.
Apan gipasabot ni Moreno, kinsa running mate ni bise mayor Rainier Joaquin “Kikang” Uy, nga walay nakitang problema ang Partido Demokratiko Pilipino (PDP-Laban) tungod ila man kining katungod.
Gidugang pa niini nga gikinahanglan niya ang kaabag ug dili mahimong kaabag si Nadya ilabi na nga anak kini sa taod-taod na nga kaatbang sa politika ni Moreno.
“Di man sab siguro mahimong kaabag si Nadya of course simply because siya na, kay naa man lage ilang agenda sa ilang grupo, so babag lang gihapon lisod gihapon kana, again I would not want to discuss that, vice mayor Kikang Uy ang tinuod nga kaabag and I need Kikang Uy,” dugang niini.
Gibutyag usab niini nga itugyan na lamang ngadto sa katawhan ang pag-ila kung kinsa ang giingong kaabag ug babag diha sa pagpanerbisyo sa lokal nga kagamhanan sa siyudad.
Gipasabot usab niini nga gani dili una una kini mohatag og komento ilabi na nga anaa pa sa kasub-anan ang pamilyang Emano apan lage dili man usab mahimo nga dili matubag ang pangutana ilabi na nga tulo nalang ka adlaw sa dili pa ang pa ang eleksyon.
“Ila man ng katungod, wala’y problema, siyempre it doesn’t mean that Nadya is a better candidate with all due respect although of course di ko ganaha’g comment kay the family is in mourning lugar di man pud mahimo di ko tubagon ang pangutana,” matud ni Moreno.
Sa pagsulat niini nga balita, nasayran nga wala pay nagduso og substitution ang partido Padayon Pilipino sa buhatan sa Commission on Elections (Comelec) base na usab sa pahayag ni Atty. Ramil Acol, city election officer, apan gikumpirma na partido PaDayon Pilipino nga si Nadya ang mohulip sa iyang amahan.