PUWERTING hadloka sa usa ka 25-anyos nga ginang dihang nadiskubrehan niya nga gibaklad siya samtang naligo sulod sa banyo niadtong Huwebes sa buntag, Mayo 9, sa Barangay San Antonio Agdao, dakbayan sa Davao.
Nagpatala sa Sta. Ana Police Station si alyas Ana, minyo, molupyo sa maong dapit ug gireklamo, matud pa, ang anak sa ilang landlord nga si alyas Junjun.
Sumala ni Ana nga alas 8 sa buntag sa maong adlaw, naligo siya ug kampante nga naghubo sa tanan niyang sapot kay sirado man ang pultahan sa banyo.
Samtang naligo, nakahangad siya sa kisame sa banyo ug nakita niya ang duha ka nagbudlat nga mga mata ni alyas Junjun nga dugay na diay nagtan-aw sa hubo niyang lawas.
Sa sobra niya ka kurat, dali siya nga nag-ilis ug migawas sa banyo ug iya dayong gipangita ang suspek.
Apan wala niya kini hikaplagi, busa dali siyang nagpa-blotter sa kuwerpo sa Sta. Ana PNP.
Nagtuo si Ana nga dugay na siyang ginabaklad sa suspek kung maligo sa banyo.
Gitambagan na lamang sa pulis si Ana nga isang-at ngadto sa barangay ang iyang kaso.