GIANGKON ni San Fernando mayoral candidate Ruben Feliciano nga iyang supporters tong upat ka armadong lalaki nga nasikop human kini nanghasi sa Barangay Bugho, San Fernando niadtong Huwebes, Mayo 9.
Pero gihimakak ni Feliciano nga gisugo niya ang upat ka suspetsado para manghasi sa balay ni Barangay Bugho councilor Joy Resogento.
Gibutyag sad ni Feliciano nga siya daw ang target sa maong pagpanghasi nga gisugdan sa mga gidudahang goons ni Resogento, nga nidagan ug pagkakonsehal ubos sa iyang kaatbang nga si San Fernando Mayor Lakambini "Neneth" Reluya.
Pero sa iyang bahin, gihimakak ni Resogento ang pasangil ni Feliciano nga giingon giambush niya ang negosyante nga nagpapili ug pagkamayor sa lungsod sa San Fernando.
Matod ni Feliciano atol sa gipatawag niini nga press conference niadtong Huwebes sa hapon, Mayo 9, mag pulong-pulong unta sila sa Barangay Bugho aron mangampanya ug madungog ang iyang mga plataporma.
Apan giingong gipabalhin siyag laing lugar nga toa didto ang daghang mga tawo apan sa dihang hapit na sila maabot kalit lang nga gipusil ang nag-una nga sakyanan nga nagkarga sa iyang sound system nga padayon nga patokar sa iyang jingle.
Sa paglingi pa ni Feliciano sa ubos sa bukid adunay daghang mga armado ang nakapalibot kanila diin usa niini iyang nailhan nga si Danny Baringian nga tanod sa maong barangay.
“Wala pa gani ko maabot sa balay ni Joy Resogento nakita ko daghan kaayo nga tao pagka kita nila nga moadto nako didto biglang nawala ang mga tao, plano na diay nila ako i-ambush, pag lili nako sa ubos daghan kaayo siya armado armalite ug Garand sa ubos, toa tong tanod niya nga si Danny Baringian nga naay warrant of arrest,” matod ni Feliciano.
Sa dihang nag buto-buto na sa armas dali nga nagpadagan ang iyang driver maayo nalang nga dali nga naabot ang mga sundalo nga niadtong tungora nga naa ra sa duol nga barangay.
“Maayo gani kay naabot ang army kay kung wala patay ko,” matod ni Feliciano.
Dali nga gipanggukod ang mga armadong tawo sa mga sakop sa 47th Infantry Battalion sa Philippine Army ug nasikop ang upat nga silang Romeo Olis, 40, nga taga Balud, San Fernando; Manuel Alidon,54, nga taga Barangay North Poblacion, San Fernando; Anastacio Solis, 50, nga taga Barangay Pooc, siyudad sa Talisay; ug Prisco Tapales, 29, nga taga Barangay Greenhills, San Fernando.
Bisag hugot ning gihimakak ni Feliciano nga iyang gisugo ang maong mga dinakapan, giangkon niya nga iyang mga supporters ang upat apan wala siya masayod nga nagdala-dala kinig armas.
Sa iyang bahin, gihulagway ni Resogento si Feliciano nga usa ka bakakon sa iyang giingon dili siya ang nipasiugda sa kagubot sa ilang barangay.
"Pagkadakong bakak ana. Nganong ako naman noon ang gi-akusar nila nga muhire ug goons nga iya man gud na," sigon ni Resogento sa iyang pakighinabi sa Superbalita Cebu.
Matod pa ni Resogento nga daghang tawo sa ilang barangay ang nakasaksi kung giunsa ni Feliciano ug panghasi niya ug sa iyang mga silingan.
Plano sad ni Resogento nga mupasaka ug kaso batok ni Feliciano tungod sa iyang kanunay nga pagpanghulga nga patyon siya ug panghasi sa ilang barangay.
Si Police Brigadier General Debold Sinas pangulo sa kapulisan sa Central nagkanayon nga ang upat nga nasikop sa mga sakop sa Philippine Army Task Force Cebu maoy kanunay nga makit-an nga mang harass sa mga tawo sa mga bukirang barangay sa lungsod sa San Fernando.
“The people there was happy kay according sa barangay captain, kadtong grupoha to mao toy permi nilang makita na suspected nga mangharass sa ilaha,” sigon ni Sinas.
Kasong illegal possession of firearms ug kalapasan sa Comelec gun ban ang ipasaka sa kapulisan batok sa upat ka armado.
Si Sinas mimando pa sa kapulisan sa maong lungsod pagpalawom sa imbestigasyon sa nahitabo kung aduna bay kalabotan ang politika.
Sa pagkakaron aduna na silay suspek apan dili lang una nganlan ni Sinas kung si kinsa bisan pa man nga miangkon na ang mga dinakpan nga supporters sila ni Feliciano.
Pabilin nga nabutang sa category orange ang lungsod sa San Fernando ug wala pay rason nga isaka kini ngadto sa red category.(AYB/ JKV)