SA MAKAUSA pa gipakita ni Jimmy Butler kon nganong angayan lang siyang anggaan og Jimmy Bucket sa dihang iyang gipangulohan ang Philadelphia Sixers ngadto sa 112-101 nga kadaugan batol sa Toronto Raptors aron tablahon ang series, 3-3 sa Eastern Conference semis sa National Basketball Association kagahapon.
Ang Game 7 duwaon sa Dominggo (Lunes sa Pilipinas).
Si Kawhi Leonard, kinsa adunay 30 puntos o kapin sa lima ka duwa batok sa Sixers ang wa makabuylo kagahapon. Mitapos man tuod siya og 29 puntos sa duwa apan sagad niini diha na sa uwahing bahin nga lisod na apson ang Philadelphia.
Wa gyud makasulbad si Leonard ug ang Raptors sa panagkumboya nila ni Butler ug sa All-Star guard nga si Ben Simmons kinsa mihagpat og 21 pountos nga mas dako pa bisag tipuon ang iyang nahimo sa Games 4 ug 5.
Si Joel Embiid bisan pa man og miduwa kini nga may gipamati sa iyang wala nga tuhod ug sa tiyan sa tibuok playoffs nakatampo og 17 puntos ug 12 ka rebounds sulod sa 35 minutos.
Samtang sa Western Conference semis, nabingat sa Portland Trail Blazers ngadto sa deciding Game 7 ang ilang series batok sa Denver Nuggets pinaagi sa pagkulit og 119-108 nga kadaugan.
Si Damian Lillard mipugnit og 32 puntos, 17 niini sa third quarter, CJ McCollum midugang og 30 alang sa Blazers kinsa wala na makaabanti sa conference finals sukad niadtong 2000 playoffs.
Apan ang nakasurprisa sa mga dumadapig sa Blazers mao ang gihimo ni Rodney Hood nga mipakatap og 25 puntos nga maoy iyang pinakadakong puntos sa playoff.
Motapon ang series ngadto sa korte sa Denver, ang top-seed sa Western Conference, diin ang modaog niin maoy makigsangka sa modaog usab tali sa Golden State Warriors ug sa Houston nga magduwa karong buntag alang sa ilang Game 6 didto sa korte sa Rockets.
Gikataho nga dili makaduwa sa Kevin Durant ning maong panagsangka tungod sa angol niini sa bagtak. (JBM)