DUWA karon:
USC gym:
4:00 pm. - Mandaue City vs. Talisay City
Gipaabot nga magdasok ang tagsatagsa ka mga dumadapig sa matag habig karong hapon diha sa University of San Carlos (USC) gym sa dihang tapuson sa defending champions Talisay City Aquastars ug Mandaue City Ballers ang finals series sa 3rd Cebu Governor’s Cup inter-cities/municipalities basketball tournament.
Kini human nga ang Ballers ni coach Gary Cortes, niadtong Huwebes sa gabii, mibawos sa Aquastars, 94-76, sa Game 2 aron pagtabla sa best-of-three series, 1-1, sa Mandaue City Sports Complex.
Ang Talisay maoy unang misakmit sa Game One, 81-76, niadtong Mayo 3. Niadtong higayona, wala makaduwa ang sentro sa Mandaue nga si Kenneth Brillo human kini masuspenso human kini matawagi og duha ka unsportmanlike foul atol sa ilang duwa batok sa Minglanilla Archangles sa semifinals round.
Giangkon ni Cortes nga ang presensiya ni Brillo sa Game 2 nakahatag kaayo og dakong kausaban sa ilang opensa.
“Actually, kon naa gud si Brillo sa ilawom morag mabuak ang ilang depensa. So, dunay gamayng advantage. Akong giingnan ang mga bata nga dili lang mo-focus ngadto ni Brillo. Kinsay bakante adto ipasa unya ataki gyud permi,” matod ni Cortes.
Sayo untang nakaarangkada ang Aquastars ug nakaposte gilayon kini og 28-12 sa first quarter. Gani ila pang naprotektahan ang ilang double digit nga labaw human sa first half, 46-32.
Apan sa third quarter nalahi na ang templada sa panag-engkuwentro ug ning higayona, ubos sa pagderiher ni Gabriel Cometa sa opensa, ang Ballers, sa kalit lang, mipahagsa og 25-2 nga rally nga nagpapas sa labaw sa Talisay.
Ang trapping defense nga gipahamtang sa Mandaue maoy nahimong dakong labad sa ulo sa Talisay kinsa napakyas sa pagsulbad sa tanghaga.
Ang tres ni Archie Buscay nga nadungan usab sa pagkapupos sa oras sa third quarter maoy naghatag og 72-61 nga labaw sa Mandaue. Gikan niini wala na makabangon pa ang Aquastars ni coach Rey Michael Gurrea.
Si Cometa kinsa mipaulbo og 23 puntos, nakapakatap sab og 16 ka assists samtang si Brillo miamot og 15 puntos nga gilamasan og siyam ka rebounds ug unom ka steals.
“Ako ra gyud gihimo ang tanan. Ingon man si coach nga atakihon lang namo permi ilang depensa. Unya nisalig lang sab ko sa akong mga kauban gyud,” matod ni Cometa.
Midugang og 14 puntos si Buscayk ug tag 13 puntos usab ang nakolekta matag usa nila ni Paul Sungahid ug Dwight Dabon.
Si Keaton Taburnal mitali og 22 alang sa Talisay apan ang ilang leading scorer nga si Jay Deiparine igo lang nakapuga og nuebe puntos.
Sa sayo pa, pormal nga gilangkat sa Balamban Shipbuilders ang third place honor human kini makaipsot sa uwahing rally sa Minglanilla Archangels, 77-71.
Si Jacob Ferandez mkutlo og 22 punts, walo ka rebounds ug unom ka assists samtang midugang og 15 si Marvin Cortes ug 13 gikan usab kang AJ Sacayan. Nangulo sa Archangels ni coach Edito Salacut si Mark Nebril.
Gawas sa tropeyo, ang Shipbuilders nga ubos sa pagdumala ni coach Dave Seblos makabulsa usab sa P200,000 nga cash prize samtang P100,00 usab ang maangkon sa Archangles. (JBM)