ANG akong mga mata mitahom
Nga nagtan-aw sa kabulakan sa Sirao
Nga nanagsayaw dinuyogan
Sa sonata sa hangin sa kabuntagon.
Samtang ang mga alibangbang
Mikiaykiay sa hangin nagpili
Og bulak kasibaan, ang mga alindanaw
Nagsuyop na sa nektar sa pula
Nga mga rosas.
(O, Musa sa akong diwanag,
Awiti ko sa maanindot mong awit
Nga mohapuhap ning nagsubong
Kasingkasing nga sa kapakyasan
Sa gugma gisakit!)
Akong nakita ang usa ka drama sa gugma
Gimugna sa salamangka sa Kinaiyahan.
Nangalaylay ang mga gihay sa kabulakan
Human tupsi sa ilang dugos ug gibiyaan
Sa mga alindanaw ug mga alibangbang.
(O, Hara sa kabulakan,
Tagoi sa ilawom sa imong dughan
Ang kasub-anan ning way palad
Nga linalang nga sama sa bulak
Sa imong tanaman gibiyaan
Sa usa ka alibangbang human masiba
Ang iyang dugamis!)
Ang mga ‘sunflower’ moyukbo
Iniglingay sa adlaw sa kahapunon.
Ang akong pagbakho ihalad ko
Na lang sa mosapod nga kilumkilom
Samtang king kasingkasing naglaom
Nga mobunok da ang ulan nga mobanlas
Sa tanan kong kasub-anan.