IPATIGBABAW ang kalinaw taliwala sa panagbangi sa maayong kabubut-on nga padayong gidangilagan sa kainit sa politika. Mensahe kini nga gipasibaw sa simbahan atol sa mga misa nga gisaulog pahinungod sa piniliay karong Lunes. Daghan nang kinabuhi ang nakalas. Ang uban nagpaalim pa sa mga samad nga nahiaguman.
Ang hinungdan mao ang ilang gitawag nga lunod patay nga lumalaban sa mga kandidato nga ilang gisuportahan.
Di hinuon ikalimod nga tungod sa salapi daghan ang way kahadlok nga moasdang bisan kong nagkahulugan kini og kamatayon.
Mao nga gipahinumduman kita sa simbahan nga sa eleksiyon karong Lunes sa kanunay ipatigbabaw ang kalinaw.
Ang mga kandidato ug ilang mga dumadapig magbaton unta og kabugnaw sa panghunahuna og likayan ang mga kasamok nga posibling moulbo ning nahabiling mga adlaw padung sa piniliay. Duha ra man gyud ang mahimong resulta sa piniliay. Daug ug pildi.
Ang tanang kandidato naninguha nga makadaug. Samtang ang uban gusto gyud nga kab-oton kini sa pinugsanay nga paagi, hinuon naay daghan nga ilaha rang gisandig sa Labawng Makagagahum ang ilang kapalaran. Di gusto og samok.
Ang kabubut-on ra sa mga botante ang ilang giagad nga way bugti bisan usa ka sentimo. Sa laktod wa sila mag apil-apil nianang pagpamalit og boto.
Labaw nga di sab sila magpasiugda nianang gitawag nga kinamangay sa bisperas sa eleksiyon. Kinsa man ning maong mga kandidato atong panghinaot nga buligan ang ilang mga paningkamot.
•••
Ning adlawa sigurado ko nga andam na ang tanang gikinahanglan alang sa mas explosibo nga coverage sa mga sakop sa media sa adlaw sa piniliay.
Gani sugod ugma ang uban mobiyahe na alang niadtong nadestino sa layo. Ako nang kasinatian kaniadto. Tibuok segundo distrito sa wa pa ni mabahin ang akong assignment.
Puwerteng lapara sa coverage. Salamat kay daghang mabuot nga lungsoranon ang sa kanunay nagtunol og mga lab-as nga inpormasyon nga maoy nakapasayon sa akong trabaho. Ang bantayanan lang mao ang mga fake news nga mahimong pasiugdahan sa mga nagkasungi nga kampo sa mga kandidato. Gitawag ni og pag filter o pag-ayag sa inpormasyon nga madawat.
Samot na kong maghisgut og kagubot. Tumang pag-amping ang gikinahanglan. Kamo nga gustong motabang pagpaniid sa dagan sa piniliay palihug suwata ang mga contact number, email address og facebook account sa mga kedia outlet nga gusto ninyong padalhan sa mga kasayuran apil na ang picture ug video.
Nindot kong buhaton nimo kini nga way sagol pamolitika. Ang actual og tinuod nga panghitabo og di tumo tumo.
Pananglit may kasikas nga imong masaksihan sa adlaw sa piniliay mas nindot nga gamit ang imong cellphone imoha kining mapadangat sa estasyonan nga imong gusto.