Albor: Kinsay angay pilion?

MAYO 13, 2019 kitang mga Pilipinhon molusad sa balaanong hukom sa pagpili. Tibuok nasod mopili og 18,000 ka mga posisyon nga naglangkob sa 12 ka mga senador, 59 partylists, 238 congressmen, 81 governors, 81 vice governors, 776 board members, 145 city mayors, 145 city vice mayors, 1,624 city councilors, 1,489 municipal mayors, 1,489 municipal vice mayors, 11,916 municipal councilors, 1 ARMM governor, 1 ARMM vice governor ug 24 ka ARMM assemblymen. Kulba sa mga pildihonon ug kulba-hinam sa mga nagduhaduha.

Apan dunay bintahosong sapian nga mopabaha og kwarta. Pahimudsan ang kakabos bayran ang ilang botos. Nodnoran ang mga botante mabutaan sa salapi. Kon higtan ang balaanong katungod sa pagpili sama ra nga gihikawan sa kagawasan. Hinuon, naay igo lang modawat apan inig botar maoy tumanon ang mando sa konsensya. Pila ramay kwarta nga makalipay sulod lang sa mubong higayon apan mag-antos sa katuigan.

Ibuhos ang suporta sa mga kandidato nga mohaom sa katungdanan ug hingpit nga mangalagad sa kinabag-an dili sa personal nga interes. Paluyohan ang matarong, ligdong, walay mansa, makigsandurot, moduaw, makighinabi, mahikap ug makasabot sa pinitik sa pulso. Isalikway ang namaligya og batasan, mata-pobre, garboso nga moduol lamang panahon sa kampanya. Magmata ug magpulaw alang sa kabulahanan. Ayaw palingla sa mga pasalig nga layo sa katumanan ug saad nga mahiuli lamang sa kakawang. Tutoki ang kaugmaon aron mahaw-as sa wala matuman nga mga damgo ug gipangandoy. Ipunting ang panglantaw sa unahan aron makabaton og katilingban nga malinawon, hapsay, luwas sa drugas, kurapsyon ug kriminalidad, komunidad nga anaa ang panaghugpong pagkab-ot sa ting-usbawan. Matuman kining tanan kay si Pres. Rodrigo Duterte molutos niadtong mangahas pag-PCOS ug pagpug-ok sa resulta.

Hinaot matag kampo magbaton og kaabli sa huna-huna aron motunhay ang kalinaw taliwala sa kainit sa politika.

Kon atong hulaman ang gipamulong ni Pope Francis, “ Kamong mga Kristyanos salmot sa politika bisan hugaw apan ang nakahugaw mao ang wala pagsunod sa Kristohanong pagtulon-an”. Buot ipasabot nga dakong tinubdan sa pangalagad ang politika. Apan ang uban man god misimang sa maayong panerbisyo nga ang posisyon gihimong gatasan sa pagpangawkaw.

Dinhi sa Sugbo dunay giubos sa Comelec Watchlist Areas (Ewas). Yellow code category ang Cebu City, Lapu-lapu, Danao ug Ronda gumikan sa higpit nga panagribal sa politika. Orange code ang Tuburan, San Fernando ug San Francisco sa higpit nga panagribal, presensya sa armadong grupo ug uban pa. (csa_1156@yahoo.com / 09064648954)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph