TULO ka mga opisyal sa kagamhanan sa lungsod sa Ginatilan, Sugbo ang gireklamo ngadto sa Ombudsman for the Visayas sa pasangil nga bisan og patay na ang usa ka konstituente sa lungsod giingong gisweldoan gihapon kini sud sa tulo ka lainlaing mga higayon niadtong 2017 ug 2018.
Gipasakaan og reklamong tulo ka counts sa kalapasan sa Section 3 (e) sa Republic Act 3019 kon Anti-Graft and Corrupt Practices Act sila si Ginatilan Mayor Dean Michael Singco, designate Municipal Planning and Development Coordinator Engineer John Rosen Ferraren ug Disbursing Officer Merilyn Atillo.
Si Ginatilan councilor Ned Itao Duterte maoy nireklamo batok sa nahisgutang mga opisyal.
Si Singco niingon nga wala pa siya makadawat og kopya sa reklamo sa konsehal.
Wa makuhai sa iyang habig si Ferraren samtang si Atillo sigon sa mayor kay namatay sa sakit nga breast cancer ning tuiga.
Sa iyang complaint-affidavit nga giduso ngadto kang Deputy Ombudsman for the Visayas Paul Elmer Clemente, pinetsahan og Enero 16, 2019, si Duterte nibutyag nga giapil sa payroll sa kagamhanan sa Ginatilan ang usa ka Medardo Cabañog nga dugay nang namatay niadtong Hulyo 8, 2016, apan gisweldoan og kinatibuk-ang P2,700 sa tulo ka managlahing higayon.
Sa kopya sa daily wage payroll nga gipasukip ni Duterte sa iyang reklamo, makita nga apil ang pangan ni Cabañog sa 15 ka mga trabahante nga gipatrabaho sud sa upat ka adlaw ug tunga gikan niadtong Septiyembre 25 - 29, 2017 og matag usa ang gisweldoan og P900.
Nausban kini niadtong Disyembre 26 - 30, 2017 ug Marso 19 - 23, 2018 nga susama gihapon og sweldo nga P900 sa mao ra gihapon nga mga trabahante.
Mabantayan sa kopya sa daily wage payroll niadtong Septiyembre 2017 nga lahi ang pirma ni Cabañog sa kilid sa iyang pangan kon itandi sa Disyembre 2018.
May makita sab nga mga pirma sa ibabaw sa mga pangan sa mga opisyal nga gipangreklamo.