18-anyos abswelto sa piskaliya

GIABSUWELTO sa Lapu-Lapu City Prosecutor’s Office sa dakbayan sa Lapu-Lapu kahagapon, Mayo 10, ang 18-anyos nga suspek sa pagpatay ni Christine Lee Silawan niadtong Marso 10, 2019 sa gabii.

Ang piskaliya nitumbok sa huyang nga ebidensya sa National Bureau of Investigation (NBI) 7 batok sa batan-ong suspek.

Ang piskaliya nipabor sa kasong murder nga gisang-at sa Lapu-Lapu City Police Office (LCPO) batok sa ilang suspek nga si Renato Llenes.

Matod ni Ruso Zaragoza sa Lapu-Lapu City Prosecutor’s Office nga gihimong basehanan sa ilang nakab-ot nga desisyon mao ang kapakyas sa NBI-7 pagprobar nga ang 18-anyos kauban sa dalagitang si Christine Lee sa Marso 10 sa gabii sa wala pa kini mapalging patay buntag sa Marso 11.

Nakasumiter man tuod og closed circuit television (CCTV) footage ang NBI-7 nga nagpakita sa lalake nga gikauban sa dalagita sa gabiing gituohang siya gipatay apan dili maklaro nga mao kini ang 18-anyos nga suspek, kinsa menor de edad pa atol sa hitabo.

Laing gihimug-atan sa piskaliya mao usab ang kakuwang sa mga saksi nga magtumbok sa 18-anyos nga mao ang anaa sa CCTV footage nga gipresentar sa NBI-7.

Aduna untay gipresentar nga tulo ka mga saksi ang NBI-7 dihang misang-at sila ug kaso sa 18-anyos apan giingong wala na kini mopatim-aw sa piskaliya dihang gipatawag unta kini alang unta sa clarificatory hearing.

Kalabot sa ebidensya sa NBI-7 nga giingong nagtukma ang lama sa dugo sa sapatos sa 18-anyos nga nakuha sa iyang panimalay sa dugo ni Christine Lee gipasabot ni Zaragoza nga dili kini mahimong madawat sa korte sanglit ang pagkuha sa sapatos sa NBI-7 usa ka “illegal seizure” sanglit wala malakip sa gihuptang search warrant sa NBI-7 niadtong tungora ang sapatos sa 18-anyos kun dili ang iya rang mga cellphone ug gadgets.

Pakyas usab matod pa ang NBI-7 sa pag-link sa 18-anyos sa Facebook account nga CJ Diaz nga maoy giingong ka-contact sa dalagitang si Christine Lee sa wala pa kini mapalging patay sa buntag sa Marso 11.

Samtang sa gipresentar nga ebidensya sa kapulisan batok ni Llenes gibutyag ni Zaragoza nga lisod ibaliwala ang positibong pagtudlo sa 7 ka mga saksi sa suspek nga mao ang anaa sa CCTV nga gihuptan sa kapulisan sanglit ang ilang CCTV mas klaro gumikan kay kuha kini nianang hapon pa ug dihang padulong pa si Llenes nga makigkita sa dalagitang biktima.

Labaw sa tanan, si Llenes niangkon sa salaud human giingong nakonsensiya sa iyang gibuhat.

Gihangop ni P/Brigadier Gen. Debold Sinas, direktor sa Police Regional Office (PRO) 7, ang kalamboan sa kaso ni Silawan human gidawat sa piskaliya ilang kasong gipasaka batok kang Llenes. (Dugang taho ni AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph