SA PAGBALIK sa Angkas sa kadalanan, usa sa rekisito nga gilagda sa Department of Transportation (DOTr) nga dili molapas sa 10-oras ang biyaheon sa usa ka rider matag adlaw.
Usa lang kini sa lagda sa maong ahensiya dihang niluwat kini og unom ka buwan nga pilot implementation sugod karong buwan sa Mayo.
Sigon ni Victor Caindec, regional director sa Land Transportation Office (LTO) 7, nga dunay pipila ka gray areas ang iyang nakiita sa pagtugot sa DOTr sa unom ka buwan nga pilot operations sa motorcycle taxis.
“For example, how do you address the issue of the declaration of the Supreme Court that two-wheeled vehicles cannot be used for commercial applications. Mao seguro na ang reason ang TWG (technical working group) ang ilang gi-recommend ang pilot test so, that they will not run counter to the decision of the Supreme court and until the law is properly amended,” dugang sa direktor.
Si Caindec namahayaag nga ang rason kon nganong gikonsiderar ang ride hailing app nga Angkas tungod kay duna kini control sa booking ug sa mga drayber niini pinaagi sa application nga gigamit niini sa booking.
Moabot sa 27,000 ka mga riders gikan sa Metro Manila ug Cebu City ang aduna’y pagtugot sa maong ahensiya nga modagan pagbalik ang ride-hailing application.
Sa guidelines sa DOTr unom ka buwan usab nga tun-an sa Technical Working Group (TWG) ang kalambuan sa maong matang nga transportasyon.
Kon ugaling moabot na sa 5% ang aksidente sa kinatibuk-ang gidaghanon sa riders, magtigom dayon ang TWG aron pagahisgutan kini.
Gawas nga 10 ka oras lang ang gitugot nga oras sa riders sa Angkas, dili pwede mosakay ang nagpangedaron og 7-anyos ug paubos.
Base sa taripa nga gilagda sa DOTr, anaa sa P20 ang unang kilometro sa Angkas, ug dugang P16 sa mosunod nga kilometro hangtod 8 ka kilometros ug P20 matag kilometro kung molapas na sa 8 ka kilometros ang gibook.
“The final report of the TWG will be submitted to the House of Representatives and Senate which shall serve as valuable inputs for legislative action,” tipik sa guidelines sa DOTr.
Gikataho nga aduna’y 6,000 ka Angkas riders ang Sugbo. Hangtod Disyembre ang pilot implementation. (Dugang taho ni SCG)