NATIKLO sa kapulisan ang usa ka lalaking nagsakay og motorsiklo kinsa giingong nag-biyahe og marijuana didto sa lungsod sa Malita, Davao del Sur.

Ang nasikop mao si Efren Maligon, 32, minyo ug netibo sa Sitio Talaud, Barangay Tikolon, Malita, sumala ni SPO3 Ramon Iballo, imbistigador sa kapulisan.

Subay sa niguwang taho kagahapon sa buntag, mga ala 1:35 sa hapon niadtong Miyerkules, nangulo si hepe Supt. Victorina Mendez, sa pagbantay sa checkpoint ubos sa Joint Security and Control Center (JSCC).

Naatol nga niagi ang suspek kinsa nagsakay og habal-habal nga motorsiklo sa Barangay Poblacion sa dapit.

Girikisa sa kapulisan ang sud sa plastic nga cellophane ug sa nasuta nila nga usa kini ka putos sa mga pinaugang dahon sa gituohang marijuana.

Dason sa taho nga duna pay liso sa illegal nga tanom ang mga sanga niini nga nakasulod sa gidoble nga kolor pula ug yellow nga sando bag nga gisudlan og gibana-banang 450 gramo sa matang sa druga.

Wa na makalahos ang suspek sa iyang padulngan sanglit gipaslak siya sa bilangguan samtang magtubang og kaso nga paglapas sa R.A. 9165 kun "An act instituting the comprehensive dangerous drugs act of 2002".

Gipadala na sab sa kapulisan didto sa PNP crime laboratory ang nakumpiskang dahon sa marijuana alang sa paghiling. (Dondon Dinoy)