ARSON kun tinuyo ang posibleng sinugdanan sa sunog sa sitio Ponce 2, Barangay Carreta, Siyudad sa Sugbo, alas 4:18 sa Sabado sa kaadlawon, Mayo 11, diin usa ka magtiayon ang namatay.
Usa ka tawo ang gipasanginlan nga maoy nagsunog, apan way nakakita sa akto nga siya ang nibuhat. Mokabat sa 114 ka balay angb naugdaw ug P900,00 ang gibana-banang danyos.
Ang mga namatay mao silang Necasio Orcullo, 62, ug ang iyang asawa nga si Proserfina, 57, human wa sila makagawas sa ilang balay.
Sa unang report, na-missing ang ilang apo nga si Sandy Arcachupas, 20, apan nipatima-aw kini niana nang pagka buntag.
Matod niya nga wa siya makatulog sa balay sa iyang mga apohan kay didto siya sa balay sa iyang hinigugma.
Si Fire Chief Inspector Noel Ababon, Cebu City Fire Marshal, nagkanayon nga ila pang ipaubos sa imbestigasyon kon unsay hinungdan sa sunog.
Ila pa usab nga ipatawag si Jason Hercisio kon tinuod ba nga siya ang nisunog.
“Cause of fire ibutang nato sa under investigation, pero dunay alleged nga gituyo kuno. Gani gi safe keeping naman sa police tong koan kay gikulata man ganina,” matod ni Ababon.
Iyang gipasabot mao si Hercisio, kinsa gidala sa Waterfront Police Station kay gisugdan na pagbun-og sa mga tawo.
ARSON?
Nagsugod ang sunog, matod pa, sa balay ni Edna Basillote, diin dunay video footage nga gikulata, matod pa, sa giingong mga pulis si Eddie Basillote, niadtong Abril 18.
Gitumbok sa mga silingan nga ang kapuyo ni Edna nga si Hercisio ang tuyo nga nisunog sa ilang balay tungod kay nakit-an kini nga nagsulod gawas pasado alas 3 sa kaadlawon sa wa pa magsugod ang kayo.
Giingong aduna kini dala nga galon nga gituohan nga maoy gisudlan sa gasolina, apan way nakakita bisan usa sa akto nga siya ang nagsunog.
Matod ni Kapitan Marciano Ando sa Barangay Carreta nga arson ang hinungdan sa sunog.
Giingong adunay nakakita kang Jason nga kadudahan ang linihukan.
“Arson gyud ni kay ang katong suspek, nadakpan man ganina. Pero adunay gamay,” matod ni Ando sa Superbalita Cebu.
Human gitumbok nga si Hercisio ang nagsunog, gitabangan siyag kulata sa mga residente.
Apan dali nga niresponde ang mga pulis sa Waterfront aron di magrabehan og kulata si Hercisio.
Hugot nga gihimakak ni Hercisio nga siya ang nag sunog sa balay sa iyang kapuyo kay wa na siya atol sa pag-ulbo sa kayo.
Matod niya nga pasado alas 3 sa kaadlawon padung siya sa Pardo aron mopauli sa ilaha nga gikompirmar usab ni Edna.
“Dili na tinuod oy. Wala jud ko diha pagkasunoga gyud kay naa ko sa Pardo ana. Ako kunoy gasunog kuno. Nagdala kuno kog gasolina. Nagsige kuno kog lakaw-lakaw sa gawas. Mismo iyang (Edna) papa kakita man nako nga nagbarog ra ko sa gawas kay nagpaabot ko sa yawe kay paingon ko sa Pardo,” matod ni Hercisio sa Superbalita Cebu.
WA MAKAGAWAS
Ang pag-umangkon ni Proserfina nga si Temoteo Arcachupas nitug-an sa Superbalita Cebu nga sa dihang niulbo na ang kayo, nakamata pa unta ang magtiayon apan gikandado ang pultahan niini.
Sa dihang nangita na sila sa yawe, wa na nila kini makit-i gumikan usab sa kangit-ngit na ug nisulod na usab ang aso sa ilang balay.
“Sila rang duha sa balay nya pagkasunog, wala na sila ka gawas kay lisod kaayo kay gikandado man gud na ilang balay. Na-trap sila kay wala siguro makaantos sa aso nakuyapan. Siguro mao nang wala na kagawas kay baga na man kaayo ang aso,” matod ni Arcuchapas.
Gisuwayan pa unta nila pag guba ang pultahan sa balay, apan tungod kay ginama kini sa puthaw, wa maabli.
Ang mga sakop sa Scene of the Crime Operation (SOCO) nakakuha sa duha ka lawas nga pulos na napaig.
Ang usa nga gituohan nga mao ang asawa didto sa sulod sa banyo samtang ang bana sa sala.
Matod ni Temoteo nga mahimo unta nga moambak ang magtiayon sa bintana sa ikaduhang andana, apan tungod sa daling pagkatap sa kayo, hayan nalumos na sila sa aso.
Wa maglisod ang mga bombero sa pagpawong sa kayo kay daplin ra sa dalan ang mga balay nga nasunog.