KIDAPAWAN CITY -- Pito ka mga barangay sa siyudad ang gipailawom sa kapulisan sa areas of concern sa nagsingabot nga piniliay.
Sumala ni Kidapawan City chief of police, Lt. Colonel Ramel Hojilla, nga plansado na ang security measures sa Kidapawan City Police Office ugma, Lunes, ilabina sa mga polling centers sa 40 ka barangay.
Uban sa kapulisan sa pagpatunghay sa seguridad sa piniliay ang militar ug mga opisyal sa Commission on Election (Comelec).
Mga barangay nga anaa sa areas of concern mao ang Linangkob, Sikitan, Sto Niño, San Roque, San Isidro ug lain pang duha nga wala gibutyag ni Hojilla.
Gipalig-on sab sa kapulisan ang Oplan Kapanalig o Oplan Bitag sa mga sakyanan nga gawas-sulod sa siyudad.
Gipakusog sab sa kapulisan ang Law enforcement operation sa dakbayan.
Samtang gihangyo ni Hojilla ang partisipasyon ug kooperasyon sa tanan nga mga molupyo sa Kidapawan City alang sa hapsay ug malinawon nga eleksiyon ugmang adlawa. (Edgar E. Fuerzas)