SA pagserbisyo sa publiko, mo-matter ba ang edad sa usa ka public servant?
Sa pulitika sa Sugbo, aduna gihapoy mga botante nga di motan-aw sa pangidaron sa mga kandidato nga ilang botohan tungod kay gawas sa edad, apil usab sa ilang gikonsiderar kon unsa ang mga mabuhat niini alang sa kaugmaran sa mga dapit nga ilang representahan.
Duha sa labing edaran ug labing batan-on nga mga kandidato sa Sugbo ang niyagyag sa ilang mga plano alang sa kalamboan sa mga konstituwente sa ilang mga lugar.
Kini mao sila si incumbent Talisay Mayor Eduardo “Eddiegul” Rivera Gullas Sr. ug Gerard Binghay Carillo.
Ang 88 anyos nga pulitiko nga haligi sa Alayon Party, gusto mobalik sa Kongreso hinungdan nga nagpapili kini og balik pagka kongresista sa unang distrito sa umaabot nga piniliay sa Lunes, Mayo 13.
Samtang si Carillo, wala may kasinatian sa pulitika, apan dili na siya bag-o niini gumikan kay ang iyang amahan nga si Atty. Gerardo “Gerry” Carillo, kanhi konsehal sa habagatang distrito sa siyudad sa Sugbo samtang ang iyang inahan nga si Jaybee kanhi spokesperson sa Dept. of Social Welfare and Development (DSWD).
Naila nga beterano na sa pulitika sa Sugbo, si Gullas nakahupot na og lainlaing mga position sa gobiyerno sud sa upat ka dekada. Sud sa 25 ka tuig nahimo siya nga kongresista sa unang distrito sa Sugbo. Nakaserbisyo usab siya pagka gobernador sud sa 10 ka mga tuig ug labing unang mayor sa Talisay sud sa tulo ka tuig dihang nahimo kini nga bag-o nga siyudad.
Siya ang nagpanday sa mga balaod nga nag-convert sa Talisay, Naga ug Carcar, mga kanhi lungsod sa Sugbo, ngadto na sa pagka siyudad.
Sa pakighinabi sa SunStar Cebu kang Gullas niadtong 2016, nahibaw-an kon unsa ang mga plano, proyekto ug programa niini alang sa turismo, peace and order, infrasture development, trabaho ug panginabuhian, revenue generation ug kalikopan.
Gusto sa mayor nga hugot nga ipatuman ang traffic rules aron dunay kahapsay sa kadalanan. Tinguha usab niya ang pagpalapad ug pagpaaspalto sa mga karsada sa unang distrito ug magbutang og circumferential road gikan sa Barangay Bulacao hangtod sa Barangay Lagtang, siyudad sa Talisay.
Pangandoy niya magbutang og Export Processing Zone sa Talisay aron makahimo og dugang mga trabaho.
Isip educator ang amahan, gusto ni Gullas maedukar ang kabataan sa iyang distrito aron kon kini makatapos sa pag-eskwela, makakita og maayong trabaho ug makatabang sa ilang pamilya.
Samtang alang ni Carillo, angay nga tutokan ang pagpatuman og loan programs alang sa mga estudyante nga maglisod og tungha.
Matod ni Carillo kini nga programa nahimo dihang siya ug ang iyang amahan nga si kanhi konsehal Gerry, nitabang sa pipila ka mga tinun-an sa lungsod sa Moalboal. Gipahuwam nila kini og kwarta ug gibayran dihang duna nay trabaho.
Tinguha usab sa 23 anyos nga kandidato sa pagkakonsehal sa Partido Barug-Partido Demokratiko Pilipino-Lakas ng Bayan (PDP-Laban) nga palig-unon ang Expanded Tertiary Education Equivalency and Accreditation (ETEEAP) program sa siyudad sa Sugbo aron ang mga tawo nga wa makatiwas og eskwela makahuman ug makab-ot ang ilang pangandoy.
Nadasig usab sa iyang undergraduate thesis, gusto ni Carillo nga matutokan ang paghatag og cash assistance sa mga senior citizen ug person with disabilities nga dili manginahanglan nga sila makabotar.
“Kon mo-vote ka, mogamay ba ang imong edad? Mawa ba imong ailments?” pahayag ni Carillo.
Sa iyang pagsulod sa pulitika,naimpluwensiya siya sa dihang nag-edad pa siya og 7 tungod sa exposure niya sa trabaho sa iyang amahan isip abogado.
Nagsugod ni dihang nagtrabaho siya isip paralegal officer sa law firm sa iyang amahan ug nakahawid og kaso diin sayop nga tawo ang napasanginlan sa mga awtoridad. (SCG, JJL)