TUNGOD sa pagpasaka na ngadto sa korte sa kaso sa pagpatay kang Christine Lee Silawayan, ihatag na sa Police Regional Office (PRO 7) ang reward money nga gitagana sa Regional Advisory Council ngadto sa duha ka mga sibilyan nga nakatabang sa pag-ila kang Renato Llenes.
Giklaro ni PRO 7 Director Debold Sinas nga way pulis nga makadawat sa kwarta sanglit trabaho nila ang pag sulbad sa usa ka kaso.
Gihatag na usab sa PRO 7 ang katungod sa Kagamhanan sa Siyudad sa Lapu-lapu ang pag award sa P1 million sa saksi nga maoy yawe sa pagsulbad sa linuog nga krimen.
Gitinguha nila karon nga mahatagan og proteksyon ang ilang mga saksi nga una nang gipang-harass sa armadong mga tawo niadtong milabayng buwan.
Si Police Colonel Limuel Obon, hepe sa Lapu-lapu City Police Office, malipayon sa desisyon sa piskaliya.
Matod niya nga sa maong kaso nga ilang gihuptan, daghan silag nakat-onan.
Iyang gipasigarbo nga ang ilang nakamaohan isip mga imbestigador, ilang nagamit.
“Daghan mig nakat-onan ani. In fact daghan mang imbestigasyon and we have and this particular case. Nagamit nato tanan ang mga nahibaw-an namo nga sa training lang, na apply namo ani karon,” matod ni Obon.
Giangkon ni Obon nga niabot sa punto nga na low morale na sila tungod sa kalisud sa pagpangita sa suspek.
May higayon nga niduol na silag espiritista aron lang mahibaw-an kinsa ang tinuod nga nipatay kang Silawan.
Apan nahayagan sila sa dihang nakakuha silag mga kopya sa close circuit television (CCTV) nga nakita ang klaro nga dagway ni Llenes.
Giangkon ni Llenes nga siya ang nipatay kang Silawan.
Ang kinatibuk-an sa hitabo iyang gisaysay pinaagi sa reenactment.
Nakuha usab ang gunting nga iyang giingon nga gigamit niya pagpatay ug paglaplap sa nawong ni Silawan.