Fake news.
Kini ang paghulagway ni incumbent Cebu Provincial Board Member Jose Maria “Tata” Salvador sa nigawas nga taho nga disqualified na ang iyang kandidatura sa iyang subli nga pagpapili pagka board member sa ikaduhang distrito sa Sugbo gumikan sa isyu sa iyang citizenship.
Ang nireklamo pagpa-disqualify ni Salvador sa Comelec gumikan sa iyang citizenship mao ang iyang kaatbang nga si Vip Semilla, kandidato sa Partido Demokratiko Pilipino-Lakas ng Bayan (PDP-Laban).
Si Semilla nireklamo nga nakalapas sa Section 68 sa Omnibus Election Code si Salvador subay sa Section 40 sa Local Goverment Code tungod kay pabilin kini nga American citizen.
Apan si Salvador nitataw nga dugay na niya gi-renounce ang iyang pagka American citizen niadtong 2015, hinungdan nga siya gitugotan sa Commission on Elections nga makadagan sa pagka bokal sa miaging presidential elections niadtong 2016.
“In fact, naka-serve na gud ta og one term (isip board member). Usahay kining election, di man sad nato sila ma-blame mangita man gyud og paagi nga unsaon ta nila pagtumba,” pahayag ni Salvador dihang nahinabi sa Superbalita Cebu niadtong Sabado, Mayo 11.
Siya namahayag nga usa ka political harassment ug black propoganda ang gibuhat sa iyang mga kaatbang sa pulitika sa pagpakatap og sayop nga kasayuran.
“Mao na atong giklaro sa atong kaigsuonan labi na sa second district nga di lang tawon sila padala sa ilad nga disqualified ta kay mao man na ilang gipadagan gud nga “ayaw ninyo botohi si Tata kay disqualified na,” di na tinuod,” dugang ni Salvador, kandidato sa Nationalist People’s Coalition (NPC) sa Mayo 13 nga piniliay.
Si Salvador, chairman sa committee on senior citizens affairs, maoy usa sa nagpanday sa ordinansa nga maghatag og binuwan nga transportation allowance sa mga opisyal sa Cebu Provincial Federations of Cities and Municipalities Senior Citizens Association of the Philippines, Inc. (CPFCMSCAPI) ug quarterly allowance sa mga presidente sa mga pederasyon.
Sa ordinansa, tag P2,000 matag buwan ang madawat sa matag usa sa 15 ka mga opisyal ug mga miyembro sa Board of Trustees (BOT) sa CPFCMSCAPI.
Samtang, tag P2,000 matag quarter ang madawat usab sa matag usa sa 36 ka mga presidente sa mga pederasyon sa mga senior citizen sa mga siyudad ug lungsod nga sakop sa lalawigan.
Isip chairman sa committee on public health and social services, si Salvador usab ang nagpanday sa ordinansa nga naghimo og scholarship program alang sa mga doktor sa lalawigan sa Sugbo. (SCG)