2 ang misalisi sa pari; 1 pamilyar

Kura paruko sa National Shrine of St. Joseph sa Dakbayan sa Mandaue nabiktima sa salisi atol sa kapistahan ni San Jose niadtong Miyerkules, Mayo 8.

Usa sa gitumbok nga suspek namay-ungan na sa usa sa mga staff sa kombento nga magbisitahan sa dapit.

Gihulagway sa pangulo sa kapulisan sa Mandaue nga anad na ang nihimo sa salaud.

Samtang, Mandaue City Police Office (MCPO) nipahinumdom nga ang salisi posible mogara ning piniliay.

Gidudahan nga samtang nag-concelebrate sa pontifical mass si Msgr. Daniel Sanico, 61, atol sa kapistahan ni San Jose sa Barangay Centro, syudad sa Mandaue, niigo ang salisi.

Gisulod sa duha ka mga kawatan ang lawak sa pari sa ikaduhang andana sa kombento.

Gibana-bana nga nahitabo ang pagpangawat alas 10:45 sa buntag, base usab sa kuha sa CCTV nga gimuntar sulod sa kombento.

Matod ni Police Colonel Julian Entoma, director sa Mandaue City Police Office, nga sa gihimo nga pakisusi sa Centro Police, ang mga kawatan ningsulod sa kwarto sa monsignor ug nikawat sa pitaka niini.

Sa pitaka, adunay kwarta, driver’s license, mga ATM cards, credit cards ug uban pang identification cards.

Gikawat usab ang duha ka cellphone ug usa ka Note 8.

Apan giklaro usab ni Entoma nga ila pang gipalawman ang pakisusi kon dili ba inside job ang nahitabo o adunay kakunsabo ang mga responsable nga anaa ra sa kombento.

Sa kuha sa CCTV, adunay duha ka mga lalake nga gitumbok sa kapulisan nga posibleng suspek sa pagpangawat.

Ang duha ka mga lalake nagsul-ob og gray ug blue nga t-shirt, disente tan-awon, apan kadudahan kon ngano nakasaka sa ikaduha nga andana nga wa man untay gitugutan. (FMD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph