ANG hepe sa Traffic Management Group (TMG) sa Davao City Police Office (DCPO) gitambalan Huwebes sulod sa intensive care unit (ICU) sa Davao Doctor's Hospital (DDH) human nabangga ang iyang gimanehong motorsiklo kagahapon sa kaadlawon didto sa Bonguyan Beach Resort, Times Beach, Matina Aplaya, siyudad sa Davao.

Si TMG chief Police Superintendent Noel Fermin nakaangkon og grabeng samad sa kalawasan dihang aksidenteng nabangga sa usa ka Maligaya Taxi (plate number) LWN-623 nga gimaneho ni Porferio Legaspi, 51, minyo, nagpuyo sa Km. 4, Bajada, ning siyudad.

Base sa spot report sa Talomo Police Station, alas 2:53 sa kaadlawon mitungha sa ilang buhatan si Legaspi aron ipatala ang nahitabo kang Fermin.

Si Legaspi nagsulti mga ala 1:10 sa kaadlawon miliko siya sa Bonguyan Beach Resort apan kalit lang mipaka ang iyang gimaneho nga taxi ug didto nalabay ang nagmaneho sa motorsiklo nga nakabangga kaniya.

Mga nakasaksi nagbutyag nga daling gidala ang maong opisyal sa mga sakop sa Central 911 sa tambalanan samtang ang iyang motorsiklo giingon nga gikuha sa mga sakop sa Highway Patrol Group (HPG) Region 11.

Dihang gisusi sa mga imbestigador sa Talamo Police Station, wala na sila nakahimo og sketch sa maong aksidente sanglit wala na didto ang mga sakyanan nga nalambigit sa aksidente sa kadalanan.

Nasayran nga gikan ang maong opisyal sa usa ka acceptance party sa usa sa mga beach resorts sa Times Beach ug dihang mipauli na kini gisugat siya sa wala damha nga aksidente.

Samtang gisusi sa Superbalita kagahapon ang buhatan sa maong opisyal, walay bisan usa sa iyang mga sakop ang mihatag og impormasyon bahin sa tinuod nga hitabo ug kahimtang ni Fermin.

Dunay miguwa nga pagduda nga basin nakainom ang maong opisyal, apan ang mga imbestigador sa Talomo Police Station nagpahayag nga dili nila makompirma sanglit gi-oxygen ang opisyal sa ilang paghiabot sa hospital.

Dili makumpirma sa kapulisan kung kinsa ang sad-an sa

maong aksidente sanglit padayon pa ang ilang gihimong imbestigasyon.

Sa laing bahin, gisusi karon sa kapulisan kung kinsa ang tag-iya ug naglabay sa usa ka kalabera sa basurahan sa alas 7:45 sa buntag niadtong Miyerkules atubangan sa FCC Davao Auto Station, Barangay Hizon, siyudad sa Davao.

Si Senior Police Officer 2 Henry Balbiran, imbestigador sa Sasa Police Station, nagbutyag nga ilang paningkamotan nga mailhan ang tawo nga naglabay sa usa ka ulo sa tawo sulod sa basurahan didto sa maong lugar.

Ang nakadiskubre sa kalabera mao ang mga barangay tanod nga gipangulohan ni Dominador Urdanita kinsa maoy mipahibalo sa kapulisan.

Atua karon gipahiluna ang kalabera sa Rivera Funeral Homes samtang nagpadayon ang imbestigasyon. (AD)