Botar gyud alang sa demokrasya

WA ko magpasabot nga mao kini ang mahitabo karong adlawa ug ugma. Kining akong sulaton basi kini sa akong nadunggan sa mga nahitabo sa mga pili-ay kaniadto kabahin sa pagpanghasi nga gamit ang kapulisan.

Kining kurap nga mga pulis nganlan natog mga scalawag nga gisuburnohan sa mga kurap nga politiko.

Usa sa tumong sa mga mangharas nga scalawag sa adlaw sa piliay mao ang paghadlok sa mga botante labi na kon gituohang mobotar kini sa kaatbang.

Makapakgang niini mao ang mga isog nga mga botante nga mahigugmaon sa demokrasya. Ayaw kahadlok. Angayang mopakitag kaisog aron mapadayag ang atong gusto botaran.

Laing tumong sa mga scalawag mao ang pagsiguro nga di makaporma ang kaatbang nga partido labi na kon dunay mahitabong vote-buying. Gani, instruction sa kapulisan mao ang pagbulsa sa ilang makit-ang kwarta. Apan di nila hilabtan ang vote-buying operations sa gidapigan. Ug gipaabot nga mosutoy ang vote-buying operations niini.

Ang ako lang kay kining ingon niini nga mga operasyon maoy binuhatan sa mga scalawag. Mapakgang kini gamit ang usa ka nahigmata nga mga botante nga mopatigbabaw sa demokrasya. Nasulayan nato kini kaniadtong 1986. Usbon nato kini karong piliay.

DEBATE

Kon duna man kitay angayang isipon nga midaog sa debate tali nilang Mayor Tomas Osmeña ug Bise Mayor Edgar Labella, alang kanako, mao kini ang nag-organize nga mao ang Integrated Bar of the Philippines (IBP).

Mao nga angayan natong pahalipayan mao si Atty. Regal Oliva, ang presidente sa IBP Cebu City chapter, ug iyang mga kaubanan. Angayan ba kitang moingon kon duna ba sa duha ka mga kandidato nga nakadaog sa maong debate?

Kon tamdan nato ang mga online survey sa Sun.Star Cebu ug sa ubang mga mantalaan, tinunga ang labaw ni Mayor Osmeña kon itandi sa kang Bise Mayor Labella.

Di na lang nato i-apil sa pagkwenta ang binayran nga false cover nga nag-ingon nga si Labella ang nidaog. Online, niguwa nga kataw-anan ang mga nipugos sa pag-post sa maong false cover.

Sa laing bahin, ang maong debate nakahatag nato og ideya sa mga baruganan ug mga plano sa duha ka mga kandidato nga gustong mag-mayor sa Syudad sa Sugbo.

Si Labella mismo nakahatag kanatog ideya nga kon hisgutan pananglit ang turismo. Alang kang Labella, ambisyoso na nga proyekto ang paghimog dalan padung sa mga flower farms sa kabukiran sa Syudad sa Sugbo.

Alang kang Tomas, iya nang gisugdan ang pagpahapsay sa Sinulog nga maoy labing dakong kalihokan nga makapadani og turista. Ang usa, pag-micro. Ang kaatbang pang-macro. (@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph