PINILIAY na pod ugma. Daghan na tang nadungog nga tingog. May tingog nga hinay, may milanog. May tingog nga daan na ug gabalikbalik, aduna say misaad og kabag-ohan. May mini, may tinuoray. May tingog nga alingogngog, may mohatag og katin-awan. May tingog sa hiwing binuhatan, may tingog nga tarong. Usahay maglibog ta kay nanagsagol ang nagkalainlaing tingog sa atong kahiladman. Saba kaayo ang atong paligid. Maglisod tag hunahuna.
Ang tawo minugna sa Dios isip Iyang larawan. Gihatagan kita og pangisip ug kagawasan. May gahom kita sa paghimo sa maayo ug pagsalikway sa ngil-ad. Apan mabalda ang maong larawan tungod kay samaran ta sa sala ug magpasagad og paminaw sa tingog nga dili Iya sa Ginoo.
Usa sa labing saba nga tingog mao ang kuwarta. Kining pagbaligya sa boto, pagtugyan kini sa kaugalingon sa tingog sa kuwarta. Tinuod, nindot ning makakuwarta ta. Apan dili ba makadangat kini sa tulo ka adlaw sa kalipay, apan tulo pod ka tuig sa pagmahay? Dili ba mobawi man ang kandidato sa ilang nagasto? Dili ba may mga kandidato nga mangitag puhonan gikan sa tinubdan nga illegal, sama sa mga negosyante sa ginadiling drogas? Dili ba ang pagbaligya sa boto pagtugyan man sa atong kaugmaon ug sa kaugmaon sa atong banay ngadto sa mga ngil-ad og tumong? Mao gihapong istoryaha ang pagpangopras. Epektibo pa kini nga nagpadayon man lang gihapon ang pagpinalitay og boto? Ang pagbaligya sa boto nagkuha sa atong kagawasan ug nagtunobtunob sa atong bili.
May tingog usab sa popularidad nga ang pilion mga tawo nga ilado bisan pag tataw ang ilang mga hiwing binuhatan. Daghan ang nagpabutabungol tungod sa popularidad. Kaluha niini ang tingog sa atong pagkasugarol. Mopili kita sa purohang modaog bisag wa na nato aninawa ang ilang pagkatawo ug binuhatan. Dili ba ang pagpili segun sa popularidad ug pagkasugarol wala maggamit sa pangisip? Mao sab ang tingog sa gahom, sa paghupot niini bisag makabalda sa kaayohan sa kadaghanan.
“Ang akong mga karnero maminaw sa akong tingog, ug nakaila ako kanila ug mosunod sila kanako,” miingon si Jesus. Diha sa kahiladman sa tanang tawo adunay tingog sa Dios nga gitawag og tanlag kun konsyensya. Moingon kini nga “himoa ang maayo ug likayi ang ngil-ad”. Alang sa Kristohanon, gihatagan og hingpit nga katin-awan ang tingog sa Dios sa tingog ni Jesus ang Maayong Magbalantay. Ang pagpatuo kang Jesus magasugod sa pagpaminaw sa iyang tingog.
Naminaw si Pablo ug si Bernabe sa tingog sa Dios nga maoy ilang gipaambit sa mga tawo. Sa dihang gilutos sila tungod sa kasina, misangyaw sila ngadto sa mga pagano. Ang pagpaminaw sa tingog sa Ginoo taliwala sa daghang laing tingog mopadangat sa tinuoray nga pag-ambahan sa Dios nga gilarawan sa libro sa Gipadayag diin nagtindog ang Karnero taliwala sa trono ug pahiran sa Dios ang atong mga luha. Ang atong pagsimba sa Dios milambigit sa pagsunod sa Iyang tingog bisan sa natad sa politika.