NIADTONG miaging Dominggo, wa ko mosubay sa akong naandan nga rota kay giimbetar ko sa akong mga higalang sila si Wendel “Phukey” Valeriano ug Rembert “Embet” Entice kay ila kong pasuwayon sa ilang mga single track nga agianan.
Dugay na kaayo kong pirme makakita nila aning ilang rota nga giingon nilang duol ra sa amoa, apan wa ko makakuyog. Sa tinuod lang, di kaayo ko ganahan og trail kay taslakan lagi kong modulhog. Apan ako sang na-realize nga mag-unsa man ang 29er kon di nako suwayan ang trail?
Ikaduha, mas ganahan kong motungas kay ang no. 1 nako nga tumong sa akong mountain biking karon mao ang pag-exercise. Sa trail ride man gud, daghan ang dulhog ini ug technical pa. Kon masipyat ka pa, mo-exhibition ka og kanaug, iuna ang buko-buko.
Mga alas 7 pasado, nag-abot mi sa Barangay Cabangahan, Consolacion nga nag-utlan sa Cebu City ug sa mao nga lungsod. Wa na ko masayod unsa to nga mga barangay ang amoang giagian tungod kay nagliyokliyok ra man ming upat: ako, si Phukey, Embet ug Kristian “Yanzee Zulu” Ouano.
Gawas ni Embet nga nag-27.5, kaming tulo nag-Niner. Makalingaw ang rota tungod kay nagsuotsuot mi og mga kakahuyan, kabugangan, kawayanan, umahan ug kabalayan. Naa pay niagi mi og kusina, yes as in kusina.
NALINGAW KO
Challenging tuod ang rota kay dunay portions nga magbantay kang di masabod sa bato aron di mo-exhibition sa pagkanaug. Dako sab og natabang ang 29er ug lapad nga ligid nga nisukol sa hait nga mga bato.
Ang among guide mao si Phukey kay iya man to nga teritoryo. Ang nakapait lang kay gibikugan ko sa among last climb nga di unta kaayo grabe katungason, except sa last loop. Nikanaug sab ko sa half sa among last nga dulhog kay mahadlok lagi kong modulhog. But nasuko na man si Phukey, akong gisakyan akong bike. Tuod man, naabot mi sa ubos nga nagsakay tanan dapit na sa Huyonghuyong, sityo sa Bacayan.
Naa na ko sa balay alas 10 sa buntag, feeling fulfilled. Pasalamat kong Phukey, Ambet ug Yanzee kay gihuwat kong makalakaw og balik human bikogi.
CEBU EPIC
Karong Hunyo 9, Dominggo, dunay tigi sa mountain biking sa Dakbayan sa Sugbo. Hayan maapil ang pipila ka mga dapit sa Balamban ug Toledo. Pulos ni kabukiran. Unsay challenging ani nga rota?Gawas nga unlimited ang tungas, giapilan sab ni og technical nga mga rota.
Mao ni ang sulti ni Phukey nako nga naka-support sa among pipila ka mga higala sa miaging tuig. Bentaha ani ang akong pipila ka mga higala sa Team Big Ring kay kinaon kaayo nila ni nga mga terrain. Kana kon nangapil sila.
Maayo unta naa koy lugar ani sa pagkuhag pipila ka mga hulagway. Good luck sa akong mga higala!