MIKULIT og kasaysayan ang defending champion Talisay City Aquastars sa ikatulong season sa Cebu Governor’s Cup Inter-Cities/Municipalities basketball tournament pinaagi sa pagpukan sa Mandaue City Ballers, 74-69, sa deciding Game Three nga gipahigayon kagahapon sa University of San Carlos gym, dakbayan sa Sugbo.
Sa kadaugan, ang Talisay maoy unang team nga nahimong back-to-back champions sa gikagubtan nga lega sa Sugbo kansang katuyoan gitumong sa pag-ugmad ug pagiya sa mga batan-on nga may igong talento sa natad sa basketball.
“Huh!!! Di ko kasabot sa akong gibati. Nawagtang ang tanan nakong kakapoy. Akong i-credit ang kadaugan ngadto sa mga bata gyud. Ni-response gyud sila. Gusto silang modaog,” matod ni Talisay headcoach Rey Michael Gurrea.
Human mabiyai og sais puntos sa sayong bahin, ang Talisay mipahagsa og 14-2 nga rally aron sakmiton ang 28-20 nga bintaha.
Nagpulipuli og sakmit ang duha ka kampo apan gilupig sa lahutay ang Ballers ni coach Gary Cortes sa fourth quarter ug nabiyaan na kini og 10 puntos. Misuway pa unta kini paggukod apan ang panagkumboya nila ni Jay Deiparine, Clark Ruedas, Keaton Taburnal ug Ronan Briones wa mapatugbabaw batok nila ni Kenneth Brillo, Gabriel Cometa, Archie Bugsay ug John Marco.
“Ang among gitutokan og maayo ang depensa. At least medio na-check namo si Cometa. Unya labaw sa tanan, nibalik na sab ang ka teamwork sa mga bata. Ako silang giingnan nga kon magbinagsa gani atong duwa, pildi gyud ta ani, so at least naka-adjust ra gihapon sila,” dugang ni Gurrea kinsa nakadayeg usab sa katakus nga gipakita sa Mandaue.
Nagpahipi usab sa maong kadaugan mao ang laing kasaysayan nga sukad sa pagkahimugso sa maong lega ang tanang na-champion nagagikan gyud sa Unang Distrito sa probinsiya sa Sugbo.
Ang Minglanilla (Archangels), ang kasikbit nga lungsod sa Talisay, nga sakop usab sa 1st District maoy unang nakampiyon sa maong lega niadtong 2017.
“Three-peat na mi,” matod ni Digoy Villanueva, ang chief of staff ni 1st District Congressman Samsam Gullas.
Gawas sa championship trophy, iuli usab sa Talisay ang makabungog nga P500,000 nga cash prize samtang P300,000 ang mahiadto usab sa Mandaue City tournament.
Ang tournament nga maoy gikagubtan sa tibuok probinsiya sa Sugbo gipasiugdahan sa Cebu Provincial Government ug Cebu Provincial Sports Commission (CPSC)
“Hopefully, bisan kinsay mamunoan, i-sustain unta ni nga tournament. Daghan na kaayong mga batan-on nga nakabenepisyo ning maong programaha. Bisan kadtong mga anaa sa hilit nga mga lungsod nahatagan gyud sila og saktong exposure ug gani ang uban atoa na sa Manila gipang-recruit. We’re happy nga nahimo ning dalan sa ilang damgo." matod ni Atty. Ramil Abing, ang executive director sa CPSC. (JBM)