NAGHIKOG pinaagi sa pag-inom og hilo ang 22 anyos nga inahan niadtong Miyerkules mga alas 7:30 sa gabii sa Patag ning siyudad sa Cagayan de Oro.
Giila ang biktima nga mao si Nizel Sogot, 22, minyo, sa susamang dapit kinsa gidala pagdali sa iyang kaugalingon nga bana sa Northern Mindanao Medical Center (NMMC) ning siyudad.
Matud sa usa sa personahe sa NMMC nga bisan ang kaugalingon nga bana wala masayod sa hinungdan sa pagsuway niini og hikog apan igo lang kini sa pag-ingon nga problema lamang sa pamilya.
Nakaplagan na lamang kini sa bana sulod sa panimalay nga nagbuy-od ug tupad ang botelya nga adunay sulod hilo. Nakuyapan ang biktima hinungdan nga gidali pagdala sa balay tambalanan.
Nitumaw ang taho gikan sa pipila ka mga silingan niini nga problemado kaayo ang biktima kabahin sa pamilya tungod sa giingong kawad-on. Adunay miingon nga nagkakalis usab kini sa bana.
Gani namatikdan kini nga magsige og hinuktok timailhan nga adunay problemang gihambin.
Hinuon, sa pagsulat ning balita gipasalamatan sa bana nga luwas na sa makuyawng kahimtang ang biktima apan padayong giobserbahan sa mga doktor samtang nagpabilin kining nagpakahilom sa hinungdan sa paghikog sa asawa. (Stephanie V. Berganio)