Inahan patay sa bangga

PATAY ang usa ka inahan samtang kritikal ang anak niini human nabanggaan ang gisakyang motorsiklo niadtong Miyerkules mga alas 12:45 sa udto sa Zone-4, Cugman ning siyudad sa Cagayan de Oro.

Si Police Officer 1 Gladys Lago sa Police Station 10 (PS10) sa Cugman niila sa namatay nga mao si Esterlita Maghigad, taga Bantiles, Bugo ning siyudad.

Kritikal usa ang kondisyon sa anak niining si Eric.

Matud ni Lago sa Sun.Star Superbalita nga nagsul-ob pa og helmet ang mga biktima ug maayo ang pagmaneho ni Eric niadtong higayona sakay sa motorsiklo nagdala og plaka 7493-KV.

Apan tungod sa usa ka Gusa liner nga kalit lang nga mitipas sa dalan hinungdan nga laing Bugo liner nga dyip nagdala og plaka KVB-840 diin gimaneho ni Jose Labnutin, 54, minyo, taga lungsod sa Tagoloan, Misamis Oriental ang mikambyo sa iyang manibela sa sa kilid nga bahin sa kahadlok niining masungag sa maong Gusa Liner.

Wala namatikdan ni Labnutin nga anaa sa iyang kilid nga bahin ang motorsiklo nga gisakyanan sa mga biktima hinungdan sa pagkasapon niini.

Tungod sa kakusog sa bangga nawalis ang hood sa dyip nga miigo sa nagmotorsiklo. Nabunal pag-ayo ang ulo ni Esterlita bisan naghelmet human layo ang gilaputan niini.

Si Eric nilagpot sab sa daplin nga bahin ug maayong pagkabali sa tiil ug pagksamad sa ulo.

Dali nga niresponde ang kapolisan sa PS10 ug maoy nidala sa mga biktima sa Capitol University Medical Center.

Apan si Esterlita dead on arrival nga gideklarar sa mga Doktor samtang si Eric nagpabilin sa susamang tambalanan ug kritikal ang kahimtang.

Matud ni Lago nga nagtingkagol ning panahona sa prisuhan si Labnutin kinsa gikatakdang pasakaan og kasong reckless imprudence resulting to homicide and physical injuries.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph