GITUNOL na sa iyang katapusang kapahulayan si kanhi Mayor Vicente “Dongkoy” Emano niadtong Sabado, Mayo 11, sa lungsod sa Tagoloan, Misamis Oriental.
Si Dongkoy mipanaw niadtong adlaw’ng Martes, Mayo 7, alas 12:28 sa kadlawon sulod sa Capitol University Medical Center (CUMC) ug gi-cremate ang iyang patay’ng lawas dayon gihaya sa ilang puloy-anan sa Cecilia Village sa Barangay Gusa, Siyudad sa Cagayan de Oro.
Gibutyag ni Governor Bambi Emano nga nausab ang pamilin-bilin niini ug niingon nga magpahaya og tulo ka adlaw aron mokita ang negosyante sa bulak sa Cathedral.
Tuod man mamatikdan ang nagbaha nga mga bouquet sa bulak gikan sa kalsada paingon sulod sa puloy-anan nga giingong dili mominos sa 500 ka bouquet.
Nibaha sab ang nipaabot sa pahasubo sa katawhan sa probinsya ug siyudad ngadto sa pamilyang Emano diha sa social media lakip ang pagpaabot og pahasubo sa mga dagkong opisyal sa nasod sama ni Presidente Rodrigo Duterte.
Nakabisita sa haya ang mga dagkong pulitiko sa nasod sama sa mga senador, congressman, governor ug uban pa gikan nagkalain laing dapit nga suod sa pamilya.
“Sa tinoud lang nahupay ang among sobra kasakit nga gibati sa pagkawala sa among amahan tungod kaninyo katawhan nga niduyog kanamo sa among kasub-anan,” matud ni Bambi.
Ang abo ni mayor ug bise mayor siyudad sa Cagayan de Oro nahimong kanhi gobernador sa Misamis Oriental ang gitapad sa lubong sa namatay sab nga anak nga si Nenotchka Emano.
Ubay-ubay ka mga supporters ug kauban sa partido ang mitambong sab sa lubong kon diin ang Santos nga Misa gipahigayon sa Candelaria Parish Church sa lungsod sa Tagoloan pangunahan ni Fr. Juliano Retiquiz.