GIHINGUSGAN ni kanhi Taglimao Kapitan William Guilani nga iyang gihuptan ang hard copy sa resolution sa Commission on Election kalabot sa disqualification case ni Mayor Oscar Moreno kon diin nakalatid niini nga dili mahimong magpapili karong piliay.
Matud ni Guialani nga nainterbyu sa Sun.Star Superbalita nga kinsa man ang tuohan sa katawhan siya nga naghupot og dokumento nga gi-mail gikan sa Commission on Elections (Comelec), Intramuros Manila o ang mga denial nga sayon ra ipamulong ug i-text.
“Nakadawat ako og kopya gikan sa Comelec Intramuros Manila nga pirmado sa to ka commissioner nag-ingon didto nga gikonsidera nga gi-grant akong petisyon nga i-disqualify si Mayor Moreno,” matud ni Guilani.
Matud ni Guilani nga ang pag-deny ni Lito Guia estorya lamang ug walay dokumento kong itandi sa iyang dokumento nga dunay pirma sa tulo ka mga commissioner.
Gibutyag usab ni Guilani nga dili siya makatubag kabahin sa gidak-on sa bond paper tungod kay siya nagdawat og pirma nga hard copy diin iyang nakuha ang kopya mga alas 4:30 sa hapon adlaw’ng Biyernes.
Daw kung wala naghupot niini og kopya ang kampo ni Moreno dili na niya problema.
"Kung angkunon ni Moreno nga tinoud ni ug original walay eleksyon karong Lunes, ang ako lang naay sakto nga copy o alibi lang?" matud ni Guilani.
Si City Comelec officer abogado Ramil Acol niingon nga gapaabot pa sila og kopya kon naa man gyod kini nga resolution.
Apan sagad niini moabot kanila sa via electronic ug sila maoy mopahibalo sa kampo kalabot sa resolution.
Labina usab kay gikan sa 2nd Division wala silay kapasidad nga mang beripika niini ug ilang mabuhat magpaabot lamang sa dokumento.
Giklaro sab niini nga samtang walay dokumento silang gihuptan sama ni Guilani magpabiling magpapili pagka mayor sa siyudad si Mayor Oscar Moreno.