GIHULAGWAY nga peke sa kampo ni Mayor Oscar 'Oca' Moreno ang nikatap sa social media nga disqualification niini niadtong Biyernes sa gabii, Mayo 10, nga gikakurat usab og maayo sa mga supporters.
Unod sa maong dokumento nga gipadala pinaagi sa messenger nga ang maong resolusyon naggikan sa buhatan sa Commission on Election (Comelec) sa Manila, second Division nga nagmando pag-disqualify ni Moreno gikan sa iyang kandidatura.
Sa gipahigayong press conference sa kampo ni Moreno nga gipangulohan sa iyang chief legal council nga si abogado Dale Mordeno nibutyag nga peke kini nga balita tungod kay walay nadawat ang ilang kampo ug daghan ang ilang mga nabantayan nga mga sayop gikan sa maong dokumento.
Pipila sa namatikdan nga bikil sa maong dokumento ang gigamit nga short bond paper unta dili kini gamiton sa legal nga dokumento, wala’y sealed gikan sa Comelec, ang petsa sa promulgation sa unang pahina sa May 1 nga unta Labor day kini ug holiday, dunay pirma sa mga commissioners nga unta ang kopya nga ihatag ngadto sa matag kampo giingong tatakan lamang kini og orihinal nga pirma, ug kung tan-awon sa website sa Comelec dili kini makita sa maong site ug uban pa.
“I doubt if it's really authentic, I don't know how this will be played out by the opposite camp but as far as we are concern this is fake news,” matud ni Mordeno.
Gidugang pa niini nga kun ugaling duna man gani moabot nga resolusyon dili kini makaapekto sa kandidatora ni Moreno.
Samtang wala’y nadawatan nga kopya ang buhatan sa City Comelec office kalabot na sa maong dokumento ug giingong kinahanglan nga makadawat ang ilang buhatan niining maong opisyal nga mga dokumento nga sila mismo ang magtunol niini ngadto sa matag grupo.
"As of now officially wala tay nadawat nga communication or electronic communication gikan sa Manila, maghulat lang gyud mi sa official document nga moabot," matud ni abogado Ramil Acol, City Election officer.
Samtang nitubag usab si Commissioner Luie Tito Guia, presiding commissioner sa Comelec sa gipadalang mensahe sa Superbalita Cagayan de Oro sa mubong tubag kalabot na sa kamatuoran sa maong resolusyon nga “Not True.”
Gipamugos usab sa kampo ni William Guialane kinsa maoy nagduso niini nga kaso nga tinuod ang maong mga dokumento.
Nasayran nga anaa sa maong dokumento ang pirmadong resolusyon sa tulo ka mga commissioners nga sila si Luie Tito Guia, Socorro Inting ug Antonio Kho Jr., pulos mga commissioner.