SUGOD alas 12:01 a.m. sa Mayo 12 hangtud 12:00 sa tungang gabii sa Mayo 13 ubos sa liquor ban ang nasud.
Kini tungod sa Midterm Elections nga gipahigayon diin 48 oras nga walay bisan kinsa nga gitugotang mamaligya og ilimnong makahubog.
Sa pakighinabi sa SunStar Superbalita kang Police Lieutenant Colonel Mardy Hortillosa, tigpamaba sa Cagayan de Oro Police Office (Cocpo), gibutyag nga wala nay gitugotan nga mag-inom lakip na magbaligya og ilimnong makahubog sugod Mayo 12.
"A day before sa election wala nay gitugotan nga mag-inom kay ang purpose ana nga walay mga botante nga moadto sa polling precinct nga hubog kay basin maoy hinungdan sa lalis," matud ni Hortillosa.
Samtang nagpahigayon ang tinugyanan sa Regulatory and Complaint Board (RCB) sa pagpangulo ni abogado Edgardo "Egay" Uy kauban ang mga Special Program on the Employment of Students o SPES pagpahimangno sa mga patigayon ug gani gikalipay ang suporta sa mga duha ka dagkong convenience store.
Matud ni Antonio Resma Jr., Inspectorate Team leader sa RCB, nga malampuson usab ang ilang gipahigayon nga information campaign.
"Generally successful man ang activity uban nato ang mga student volunteers, nalipay sad kita kay naka istorya ta sa management sa duha ka dagko nga convenience store (7/11 and Chams) ug sila supportive kaayo ani nga pahimangno, in fact atong gi hatag atong mga signages sa management para sila nalang mag distribute sa ilang mga branches," matud ni Resma.
Giingong nagtabang mismo ang mga SPES sa information campaign ug nagpahimangno kalabot na sa liquor ban gani dunay mga signages ug hotline sa kapulisan nga mahimong mapadangatan sa mga report alang sa dinalian nga aksyon.