BAGUIO

Luzano: Botos mo, sagrado... Paneknekam!

Karit Ken Kayetket

NAPATEG daytoy nga aldaw. Ita a mapabaro manen ti pondasyon ti masakbayan. Ngem ita met laeng nga aldaw nga agpeggad ti masakbayan iti biddut a panangeddeng. Sagrado ti botostayo, rumbeng a masaluadan. Saludsod: nakasaganaka kadin a mangitukit iti bukel a pagtawidanto dagiti sumaruno pay a puli babaen iti BOTOSMO? Masapul a saanka a nagbiddut iti pinilim a pondasyon. Intay man siripen dagiti nagduduma a ramen ti tunggal eleksiyon tapno mapatibker pay ti ramot a saripda ti masakbayan...ngem intay man biit lumagip kadagiti kontrobersiya itay

kallabes:

***

Gimluong ti kadagsenan a kontrobersiya itay nabiit kagiddan ti agsasarumbinit a birada-kampanya dagiti agbabalubal a partido-pulitikal. Ania manen daytoy? Adda dagiti tao ken grupo kano a kayatda a dadaelen ti administrasyon-Duterte. Maryusep! Saan laeng a dagiti puntiryada a kandidato ti administrasyon no di ketdi nairamraman payen ti pamilya-Duterte. Tsk tsk...bistado nga adda pakainaigan iti pulitika ti nasao nga addang tapno mapaboran dagiti kandidato ti oposisyon. Ala...irugitayo iti puon wenno punganay ti kontrobersiya: maysa a managan “Bikoy” ti simngat a gurruod nga adda kano iti “Bikoy Video” mainaig kano iti “Pudpudno a Narcolist” (Ang totoong Narcolist”) a nagkuna nga umaw-awat kano iti pirak manipud droga da sigud a Davao City Vice Mayor Paolo Duterte, Atty. Mariases Carpio (mister ni Davao City Mayor Sara Duterte) ken Christopher “Bong” Go. Natural...adu ti nagpiyesta iti nakuna a padamag nangruna kadagiti anti-Duterte groups. Saan met a nagbaybay-a dagiti otoridad. Ti follow- up, adda managan Rodel Jaime ti naaputda a naitudo a nakaidalanan ti nakuna a “Bikoy Video” tapno maup-load iti internet. Adu dagiti napapateg a testimonya ti naitedna kadagiti otoridad. Sinapulda

ti tao nga adda iti likud ti “Bikoy video”.

***

Ti simmaruno nga eksena: limtuad ti maysa a managan Peter Joemel Advincula alyas “Bikoy” iti maysa a presscon sadiay IBP – Integrated Bar Of the Philippines. Inakona nga isu ni Bikoy ket pinaneknekanna dagiti linaon ti “Bikoy Video”. Ditan a nangrugi ti letanya iti panagusisa iti kinatao ni Advincula. Ti saludsod: pudno kadi dagiti imbutaktak ni Bikoy? Adda kadi dagiti ibedensiyana iti likud dagiti akusasyonna? Maikadua a saludsod: apay a sadiay pay IBP ti nangibutaktakanna ken nagparanganna? Kayatna kano ti agpatulong iti IBP. Ngem ti kaudian a pangeddeng ti IBP-National Center for Legal Aid (NCLA), saan kano a kuwalipikado ni Advincula alyas Bikoy ta awan kano ti panpaniganda nangruna ta ti patpatamaan ni Bikoy ket ti Administrasyon ti karaman iti illegal a droga. Nagtignay met ti Senado ket impasingkedda a maimbestigaran ni Advincula. Ngem kas iti kaudian a nakuna ni Sen. Panfilo Lacson, kinanselardan ti nakuna nga imbestigasyon gapu ta “nonsense” to met laeng kano ti ibutaktak ni Bikoy. No apay...adun dagiti naduptalan dagiti nagsukisok iti kinatao ni Bikoy nga adu gayamen dagditi kaskaso daytoy iti naglabas ket di rumbeng a pamatian dagiti baro manen a patutsadana.

***

Iti benneg ti PNP, kinuna ni PNP Chief General Oscar Albayalde a di mapagtalkan ken agilaklako kadagiti impormasyon kadagiti highest bidder ni Joemel Advincula alyas Bikoy. Iti panagsukisok ti PNP, naduptalanda nga adda gayam dua nga intelligence agencies ti gobyerno ti linokon ni Bikoy. Nagkiddaw kano daytoy kadagiti nakuna nga ahensiya iti manipud P50,000 agingga iti P70,000 kasukat ti impormasyon panggep kano kadagiti ammona a laboratoryo ti shabu sadiay Bicol Region. Ngem idi nagtignay dagitoy nga ahensiya a nangipatulod ti operatiba a nagsukisok iti impatuldo ni Bikoy a disso ti shabu lab...palso met gayam ta maysa a resort ti nakuna a disso. Innayon pay ti PNP report nga idi nakulong sadiay Bilibid ni Bikoy (Advincula), inlaslastogna kadagiti kakosana a miyembro kano daytoy iti sindikato ti illegal a droga, ngem naammuan dagiti imbestigador a saan a pudno ti ibagbagana nga impormasyon.

***

Adda met inruar ti Senado, babaen kenni Senate President Vicente Sotto, a maysa a daan nga affidavit ni Peter Joemel Advincula a mangak-akusar kada sigud a Presidente Benigno Aquino, Mar Roxas ken Sen. Leila de Lima a dagitoy kano ket umaw-awat iti kuarta manipud illegal a droga. Masiguro ni Sen. Sotto a ni Advincula ti napan iti opisinana idiay Senado iti 2016 nga isu met laeng ti alyas Bikoy nga akin-aramid iti “Ang Totoong Narcolist” videos ken ti tao a nagpa-presscon sadiay IBP. Innayon pay ni Sotto a ti affidavit ni Advincula idi 2016 (Adda kopya ni Sotto) kontra grupo ni Aquino ket kapareho ti baro nga affidavitna kontra Duterte group. Pareho ti pannakaaramid ken pannakabukel ti affidavit ngem nasuktan laeng dagiti nagan. Saludsod: agmaymaysa ngata daytoy a Bikoy wenno adda dagiti tao iti likudna? So, masapul siguro a maimbestigaran a naimbag tapno mapalutpot daytoy a banag. No mabaybayadan ti impormasyonna ken addan dagiti kaskasona iti estafa ken illegal recruitment (kas kuna ti rekords ti pulisya) ...adda posibilidadna nga adda nangbayad kenkuana tapno aramidenna ti “Ang Totoong Narcolist videos”, saan ngata, pards? Sus no sibibiag la koma daydi lolok...maryusep, amangan ta pinalsiitannan dayta a Bikoy. Kabusor daydi lolok ti lastog nangruna dagiti suitik ken limatek. Siguro no sibibiag daydi lolok, kandidato ita. Ngek!

***

Inakusaran met ti Malakanyang ti Liberal Party ken grupo a Magdalo nga adda kano pakainaiganda iti addang tapno madistugaw ni Pres. Duterte ken tapno mapapigsada ti kandidatora dagiti senatoriables ti dilawa babaen iti panagaramatda iti “Bikoy video”. Dayta ti imbutaktak ni Presidential Spokesman Salvador Panelo. “Batay sa intelligence information, na ang Liberal Party, mga Dilawan, Magdalo at ilang media outfits na kasama sa ipinakitang matrix noong isang lingo,” nakuna ni Panelo. Karaman kadagiti personalidad nga innaganan ni Panelo a karaman kano iti “conspiracy” tapno madadael ti administrasyon Duterte ken maiduron nga agpangato ti kandidatora dagiti tumartaray iti kina-senador manipud Otso Deretso. Nairaman ti nagan da Sen. Bam Aquino, Sen. Antonio Trillanes ken Mar Roxas. Agpapan ita, kontrobersiya pay laeng ti nakuna a Matrix ni Panelo. Saan kano a nakappapati, kuna dagiti maseknan.

***

Subliantayon ti pagrebbengantayo a kas botante: Ditay koma agbiddut nga agpili ta adun dagiti manglimlimo. Adu dagiti kari ngem balintongeg met gayam. Adu dagiti tinagtagupulutan ti dilada iti kinasam-it ngem napapait pay ngem parya ti kinapudnona. Adu dagiti balangkantis kadagiti kandidato nupay adu met ketdi dagiti nalinteg ken nadalus nga agsirbi. Masapultayo laeng ti sirib a mangammo iti kinatao ken kinapudno dagiti karida. Ditay koma papurar iti adu a sapata ken adu a pirak ta katukadna dayta ti nakakaasinto a masakbayan. Ibotosmo tay kapkapnekam a dikanto pagbabawyan. Tay sangapirgis a kammalim, ag-gagaburto a dinaldaluson ti katukadna a malas. Good luck kadagiti amin a kandidato ken botante!

Adios mi amor, ciao, mabalos!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph