JAMPACKED ug star-studded ang uwahing hunat sa miting de avance sa Hugpong ng Pagbabago (HNP) sa Carmen ug Panabo Davao del Norte, Sabado sa gabii, Mayo 11 ning tuig.
Sa Carmen Municipal Gym, nalingaw og taman ang mga naminaw sa miting de avance sa mga opisyales nga nagpapili sa dapit, human mi-eksena si Kakai Bautista nga birit kung birit ang labanan.
Nalingaw ang tanan sa mga pasiaw ug nindot nga boses sa “Dental Diva.”
Luyo kaniya, halinon sab kanila angkol ug ante si Renz Verano nga misikat sa kantang “Remember Me.”
Ug mas nahugyaw ang tanan, human mirampa sa entablado ang machong si JC de Vera nga bida sa seryeng “The General's Daughter” sa ABS-CBN.
Si Ethan del Fierro sa serye mipakilig og taman sa mga taga Carmen sa iyang medley songs nga mipatok di lamang sa mga bagets, lakip nasa mga feeling young at heart.
Human sa ilang paghatag og lingaw sa mga taga-Carmen, mibiyahe na sab sila padung Panabo City ug didto nagsaba-saba.
Naka-join na sab nila Kakai, Renz ug JC ang Kapamilya actress Maja Salvador.
Sa iyang pagpamulong si 2nd district Davao del Norte Congressman Antonio “Tonyboy” Floirendo nga dako ang ilang kahingawa ug kalipay nga makahatag og kalingawan sa ilang mga constituents.
Gidasig sab niini ang mga botante nga mogawas karong Lunes, mobotar, mopili og mga kandidato nga may kaligdong sa pagserbisyo.