AKO si Cecilna Talisik, 35, taga-Enaad Tabunan, Cebu City, ug may duha ka mga anak nga nag-eskwela pa sa elementarya.
Aduna akoy water refilling station diin ang akong bana maoy akong katambayayong sa pagpadagan.
Sama sa uban, nagsugod ko sa gamay sa akong negosyo. Sa kapital nga P20,000, nipalit ko og tulo ka coffee vending machine niadtong 2013. Kini tungod kay kulang gyud kaayo ang kita sa akong bana nga usa ka drayber.
Sa maong panahon naghunahuna na gyud ko nga mas mayo ang water refilling station, ilabi na kay walay nagnegosyo ana sa among barangay, apan wala lang gyud ko kahibalo unsaon nga makakuha og dugay kapital.
Tuig 2015 dihang adunay usa ka staff sa RAFI Micro-finance, Inc. (RMF) nga naabot sa among lugar ug niagni kanamo nga moapil sa ilang programa.
Wala ko magduhaduha og niapil dayon ko, kay kahigayonan na kadto sa akong gipangandoy nga dugay kapital. Kay alang kanako, dili daotan ang mangutang basta gamiton lang gyud ang kwarta sa maayong pinaagi sa pagdapat sa kwartang hinulaman sa negosyo. (Naingganyo sab ko kay may insurance sab alang sa ilang mga kliyente.)
Tuod man, sa hinayhinay ug pagsige nako og loan akong napundar ang gipangandoy nakong water refilling station. Dili gyud lalim ang akong naagian ilabi na kay aduna sab koy pamilya nga gibuhi.
Nagpasalamat lang gyud ko og dako sa Ginoo kay gitagaan ko niya og bana nga motabang gyud ug moabag sa pamilya. Dako nga tabang ang negosyo kay dili na man ko magsalig sa sweldo, nga binuwan madawat, kay kada-adlaw naa man koy makuha.
Alang sa uban nga ganahan magnegosyo, ang akong masulti mao nga mosalig lang gyud sa Ginoo ug magkugi, kay ang imong kahago karon maoy puhonan sa imong malambuong ugma.
Mapasigarbuhon si Nanay Cecilna nga tungod sa dugang kapital natuman ang iyang damgona magtukod og water refilling station. Kining multicab maoy iyang gamit sa pag-deliver sa mga order ng tubig.