DAVAO DEL SUR -- Dul-an usa ka libo nga kapulisan ang gipakatag sa Davao del Sur Police Provincial Office (DSPPO) aron mobantay sa 2019 Midterm elections karong adlawa.
Giangkon ni Col. Alan Manibog, police provincial director, nga usa ka dakong hagit kanila ang pagpatuman sa kahapsay'g kalinaw ilabi pa nga angayang bantayan ang mga Election Watchlist Areas. (EWAs)
"This May 2019, we are again faced with the challenge of keeping our 2019 Midterm Elections peaceful, credible and honest. We will be at the forefront of keeping the sacredness of the people's vote and keeping the voters and the people involved in the elections, safe and secured," asoy ni Manibog.
Gipaniguro ni Manibog nga andam ang tanang kapulisan sa lalawigan nga moresponde ugaling aduna'y mga dapit nga masamok ang piliay.
Aduna'y 994 ka pulis ang gipakatag sa nagkadaiyang dapit sa Davao del Sur aron masigurong hapsay ug malinawon ang eleksyon karong adlawa.
Gipahinumdoman sab ni Manibog ang publiko nga nagsugod na ang duha ka adlaw nga “liquor ban,” alas 12:01 sa tungang gabii kagahapon, Mayo 12 ug motak-op sa alas 11:59 sa Mayo 13. (Orlando B. Dinoy)