DATU ODIN SINSUAT, Maguindanao -- Dakong kantidad sa kuwarta ang target sa pagpamanhig sa Municipal Treasurer alas 8:30 sa buntag niadtong adlaw nga Sabado sa probinsiya sa Maguindanao.
Giila ang mga biktima nga sila Phoebe Pimentel, Municipal Treasurer sa Datu Saudi Ampatuan Maguindanao ug iyang drayber nga si Edwin Masukat.
Gibutyag ni Maguindanao Police Provincial director Colonel Ronald Briones nga sakay ang mga biktima sa kotse nga gimaneho ni Masukat gikan sa Cotabato City paingon sa Datu Saudi, Ampatuan, Maguindanao.
Apan pag-abot nila sa Barangay Taviran Datu Odin Sinsuat, kalit lang mibutho ang wala mailhing mga armadong kalalakin-an ug gipamusil sila gamit ang kalibre .45 nga pistola.
Bisan samaron ang drayber nakahimo pa kini sa pagpadagan sa kotse paingon sa detachment sa mga sundalo ug nangayog pakitabang.
Gisapupo ang mga biktima sa mga sundalo ug gidala sa Cotabato Regional and Medical Center diin luwas na sa makuyaw nga kahimtang nga pulos naka-angkon og samad pinusilan sa ilang bukton.
Tulis ang gilantaw sa otoridad nga motibo sa pagpamanhig gumikan ang mga biktima dunay dala nga kuwarta kantidad unom ka libo ka pesos nga i-suweldo sa mga empleyado sa LGU-Datu Saudi Ampatuan.
Kapulisan padayon nga naghimo og imbestigasyon sa hitabo. (Edgar Fuerzas)