GILIMOD ni aspiring Davao del Norte Governor Edwin Jubahib ang alegasyon sa former security aide ni Davao del Norte 1st District Representative Pantaleon Alvarez sa paggamit og pundo sa gobyerno alang sa pagpalit og mahalong sakyanan ug propedad sa probinsya.
Si Jeffrey Lopez Cabigon, kinsa nagpaila nga former security aide ni Alvarez, mi-file og plunder charges sa office of the Ombudsman-Mindanao niadtong Mayo 6 batok kang former speaker Alvarez kinsa midagan isip representative sa 1st District sa DavNor ug sa iyang chief of staff nga si Jubahib kinsa anaa sa gubernatorial seat.
“Ang akong masulti kana tanan nga gihimo ni Jeffrey Cabigon, nasayod ako nga adunay katumbas niana nga dakong kantidad kay kana tanan iyang giistorya matod kanako, wala kanay kamatooran ug dili gyud kana tinood," sulti ni Jubahib atol sa usa ka press conference sa miaging adlaw sa Tagum City.
Dugang ni Jubahib, “Himu-himo lang nang tanan para lang pandaot sa akoa kay nakita nila ang suporta sa katawhan sa akoa ug mao nang ila ko nga gihimoan og isyu para maguba ang among maayong plano sa katawhan."
Luyo niining tanan, si Jubahib nagpasalamat sa katawhan sa DavNor gumikan iyang nakita nga ang katawhan kaniya nagsuporta.
"Dako akong pagsalig sa katawhan sa DavNor, nga dili gayod sila magpahaylo sa bisan unsa pa nga ihatag sa kaatbang, ang katawhan ang labing nasayod kinsa si Kuya Edwin Jubahib," niya nga ginganlan og tigpanalipod sa mga pobre sa DavNor.
Dugang niya, "Ako mapasalamaton sa katawhan nga bisan sa mga higayon sa pagpangdaot sa pikas, nagpabilin ang katawhan nga nagmalig-on ingon ug alang sa ilang kaugmaon, kay kung subayon, wa gyod milambo ang panginabuhian sa dugay nga pagdomina sa pikas. Kanako, masaligon ako sa katawhan nga sa kanunay anaa kamo sa akong kiliran," panapos ni Jubahib. (Juliet Revita with Jeepy Compio)