NAGPAHIMANGNO ang Commission on Elections (Comelec) Davao nga likayan ang pag-inom og ilimnong makahubog karong adlawa aron di gyod matutyo sa kapulisan subay sa liquor ban nga gipatuman sa kapulisan alang sa 2019 midterm elections.
Sumala ni Atty. Krisna Samantha Caballero, spokesperson sa Comelec-Davao nga epektibo ang maong liquor ban gikan alas 12 sa kaadlawon sa adlaw nga Dominggo, Mayo 12, ug molungtad kini hangtod sa Mayo 13, 2019, karong adlawa hangtud unyang tungang gabii.
Gidugang ni Caballero nga gawas sa liquor ban nga gipatuman, gidili sab ang bisan unsang sugal sa maong panahon.
Sa bahin sa Davao City Police Office (DCPO) gibutyag ni Senior Inspector Ma. Theresita Plaza-Gaspan nga modakop gayod sila sa mga tawo nga malapason niini.
Giingon sa opisyal nga likayan usab nga hubog nga moadto sa mga polling precincts aron malikayan ang kainit sa ulo nga mosangko sa kasamok.
Ang opisyal nagbutyag nga mapriso ngadto gikan sa usa hangtud duha ka tuig ang si bisan kinsa man nga mosupak niini nga balaud.
Dili lang kini sa Davao City gipatuman apan sa tibuok rehiyon onse aron mapabilin ang kalinaw sa piniliay karong adlawa.