BISAN og nadeklarar na sa Cebu Provincial Board (PB) nga ubos sa state of calamity ang lalawigan sa Sugbo tungod sa hinay nga El NIño, apan gikinahanglan gihapon ang deklarasyon sa matag local government unit (LGU) o pagsagop sa maong deklarasyon sa PB.
Si Rhee Telen Jr., disaster officer sa Provincial Disaster Risk Reduction and Management Office (PDRRMO), nipasabot nga gikinahanglan ang deklarasyon aron makagamit ang mga LGU ang ilang quick response fund (QRF).
“Kay the declaration of our state of calamity is for the ulitization sa provincial fund (which will assist sa LGUs),” dugang pagpasabot niini dihang nahinabi sa mga tigbalita niadtong Biyernes, Mayo 10.
Apan bisan kon naa o walay deklarasyon, gipasalig ni Telen nga motabang gihapon ang kagamhanan sa lalawigan sa Sugbo sa mga LGU.
Apan tungod kay limitado ang ilang pundo gikan sa QRF, prayoridad nga matabangan sa Kapitolyo ang gagmay nga mga lungsod nga ubos sa 4th ug 5th class sanglit sanglit gagmay lang ang mga QRF niini kon itandi sa mga siyudad ug dagkong mga lungsod.
Niabot na og dul-an sa P111 milyones ang gibanabanang kadaot nga namugna sa hinay nga El Niño sa mga pananom, fishery ug panginabuhian sa 39 ka LGUs sa lalawigan.
Sa Mayo 8 nga updated report sa El Niño sa PDRRMO, niabot na og P110,999,856.59 ang kadaot sa El Niño base sa mga report ug sa nahipos nga reports sa maong buhatan.
Nadugang ang P317,500 sa lungsod sa Poro ug P2.75 milyones sa lungsod sa San Francisco, isla sa Camotes.
Sa 39 ka mga LGU, 13 pa lang ka mga LGU ang nakadeklarar na og ubos sa state of calamity sa ilang mga lugar pinaagi sa ilang kaugalingon nga deklarasyon samtang ang uban nisagop sa deklarasyon sa PB.
Ang mga lungsod sa Alcoy, Minglanilla, Samboan ug Barili ang wala pa makasumitir og damage report sa PDRRMO, matod ni Telen.
Kini mao ang mga lungsod sa Ginatilan, Minglanilla, Samboan, Sogod, Tudela, Dumanjug, Alcoy, Santander, Carmen, Compostela ug Asturias ug mga siyudad sa Carcar ug Talisay.
Kini nagpasabot nga mahimo na makagamit sa ilang QRF ang maong LGUs nga dunay deklarasyon sa state of calamity. (B)