MOABOT ngadto sa 75 ka mga Voters Registration Verification Machine (VRVM) ug 55 ka Vote Counting Machine (VCM) ang nag malfunction atol sa pagbukas sa mga polling precincts sa tibuok Central Visayas.
Matod ni Police Brigadier General Debold Sinas, panguo sa Police Regional Office (PRO) Central Visayas, nga bisan nag malfunction ang maong mga makina, wala kini makapugong sa botasyon sanglit gi mano-mano nalang ang pag botar sa mga tawo.
Ang Commission on Election (Comelec) mipasalig nga mahimong iphon ang mga balota pinaagi sa mano-mano kung hingpit nga dili maayo ang maong mga makina.
Giangkon ni Atty. Veronico Petalcorin, ang acting Regional Election Director sa Comelec 7, nga adunay 120 ka balota gikan sa lungsod sa Alburquerque, probinsya sa Bohol, ang nasaag ug naabot kini sa lungsod sa Cordova, lalawigan sa Sugbo.
Matod ni Petalcorin nga dali nila nga gipadala ang maong mga balota sa lungsod sa Alburquerque uban ang militar, kapulisan, mga sakop sa Parish Pastoral Council for Responsible Voting (PPCRV) ug mga representante sa nagkadaiyang partido ug gisugat usab kini sa mga sakop sa Comelec sa probinsya sa Bohol.
Gipasalig ni Petalcorin nga dili makaapekto sa resulta sa piniliay ang gihulagway niya nga ginagmay nga problema.
Samtang, giduso na sa Comelec ang hulga nga nadawat ni Cebu City North District election officer Marchel Sarno gahapon nga miresulta sa pag parelibo niini sa katungdanan.
Si Sinas mipahibawo nga mihimo na silag imbestigasyon aron mahibaw-an kinsa ang nag paluyo sa pagpang hulga.
Miabot na usab sa 121 ang ngangadakpan sa liquor ban tibuok rehiyon samtang pabilin nga lima ang kaso sa vote buying. (AYB)