NAKABOTAR pa ang 72-anyos nga lalake sa Pasil Elementary School kagahapon sa buntag, atol sa piniliay apan mao na diay kadto iyang uwahing pagbotar human kini mamatay tungod sa cardiac arrest.
Ang biktima naila nga si Eronico Bernardino kinsa residente sa maong barangay gideklarar kini nga patay alas 11:33 sa buntag, Mayo 13 sa Cebu City Medical Center.
Matod sa operations chief sa Cebu City Disaster Risk Reduction Management Office Wesley Vincent Santos-Yñigo nga nakadawat sila og alarma nga aduna’y ni-collapse sa maong tunghaan alas 10:34 sa buntag.
Dali nilang gidala ang biktima sa CCMC apan gideklarar na kini nga dead-on-arrival.
Matod n Yñigo nga gikuyogan pa sa iyang apo si Bernardino dihang nibutar kini apan dihang nakagawas na kini sa iyahang presinto, mga 20-30 minutos, nikalit lang kini og hagba.
Ang Pagasa sa ilang bahin nagkanayon nga niabot sa 34.9 degree celcius ang kainit pasado alas 11 sa buntag atol sa adlaw sa piniliay.
Nasayran usab nga mas taas ang heat index niini diin niabot sa 44 degree celcius.
Mas nitaas pa ang kainit sa panahon dihang nitungtong sa alas 2 sa hapon apan anaa nalang sa 41 degree celcius ang heat index niini.
Matod ni Pagasa Visayas officer-in-charge Engr. Al Quiblat nga nipasidaan na sila daan sa mga dili kasugakod nga mobotar kini sa wala pay alas 10 sa buntag o human ang alas 3 sa hapon.
Samtang sa inisyal nga natala sa CCDRRMO karong alas 2 sa hapon, niabot sa 22 ka mga tawo ang nakasinati og lipong ug nakuyapan dihang namotar kini ganina.