PULOS patay dihang nahidangat sa tambalanan ang upat ka mga lalaki human giingong misuway og labay og granada sa operasyon sa kapulisan sa Vamenta Subdivision, Barra, lungsod sa Opol, Misamis Oriental.
Si Princess Joy Enriquez, kinsa tigpamaba sa Misamis Oriental Provincial Police Office, niingon basi sa record nga nagpahigayon og joint operation ang kapulisan sa Provincial Drug Enforcement Unit uban ang Opol Municipal Police Station.
Mga alas 11 sa gabii, gikasa ang operasyon pinasikad sa warrant of arrest batok unta ni Nelson Manlosa alyas Boyong, kinsa naa sa drug watch list, nag-atubang og kasong kasupakan sa Republic Act 9165 kon Dangerous Drugs Act ug walay girekomendar nga piyansa.
Lakip sab si Manlosa sa top three most wanted sa drug personality sa lungsod.
Apan dihang namatikdan sa suspek nga pulis ang nioperasyon kalit nga nagpabuto sa ilang mga pistola dungan sa pagsuway og labay og granada hinungdan nga nahitabo ang pagpamusil.
Lakip sa naigo mao sila si Almerante Teñeza, 63; Jonny Gacrama, 40, ug Arman Gutirriez, pulos residente sa naasoyng subdibisyon.
Pulos gipangdala sa Northern Mindanao Medical Center ang mga biktima apan dead on arrival kining gideklarar ni Dr. Napih Macarimbang.
Ang crime scene gisusi sab sa Scene of the Crime Operatives ug narekober ang duha ka 38 kalibre nga aduna pay mga buhing bala ug lima ka mga empty shells nga gitouhang maoy gipabuto.
Nakuha sab ang duha ka MK2 fragmentation ug pito ka pakete sa gitouhang shabu.
Una na miingon si Police General Rolando Destura, ang Provincial Director sa Misamis Oriental Provincial Police Office, nga dili mahimong maunhan sa mga suspetsado labina sa operasyon ug kanunay nga nakaalerto.