Mga gamit panagat gitunol sa coastal barangay sa Oro

MAPASALAMATON ang mga mananagat kinsa maoy makabenepisyo sa gitunol sa nasudnong buhatan sa Bureau of Fisheries and Aquatic Resources (BFAR) pinaagi sa Liga ng mga Barangay sa siyudad sa Cagayan de Oro.

Mga 24 ka bangka ang opisyal nga natunol ngadto na sa asosasyon sa mga mananagat niadtong Biyernes, Mayo 10 sa Barangay Gusa, dakbayan sa Cagayan de Oro.

Gibutyag ni Daylinda Sabellano, federated president sa fisherfolks sa siyudad, nga nagpasalamat sila sa presidente sa Liga ng mga Barangay ilabi na kang Konsehal Yam Lam “ALam” Lim tungod kay suod kini ni Presidente Rodrigo Duterte ug nakapangayo dayun og proyekto direkta mismo kaniya alang sa mga mag-uuma ug mananagat ilabi na sa distrito dos sa siyudad.

“Kwarenta ang naabot tanan, walo ka payao, ang isa ka bangka is duha kung 90 so naa tay 108 ka beneficiaries sa ikaduhang districto, kay Konsehal Alam Lim, sa Presidente ni niya gihangyo, pasalamat kaayo mi,” matud ni Sabellano.

Samtang mapasalamaton usab si Federito Surbano, 53, nga taga Purok 5, Barangay Gusa, sa maong siyudad, nga dako na kaayo kini og tabang alang kanila nga mga mananagat.

Gibutyag usab ni Lim nga nakita niini ang kakulangon sa mga kabarangayan ilabi na sa distrito dos diha sa ilang panginabuhian ilabi na sa mga mananagat hinungdan nga nihangyo personal ngadto kay Duterte ug naaksiyonan dayon kini pinaagi na usab sa pagpa-anhi mismo ni Department of Agriculture Sec. Emmanuel “Manny” Piñol.

“Akong gihangyo nga tagaan ko niya og ayuda nga kinahanglanon sa atong distrito dos sama lugar sa fisher folks, mga livelihood kay as Liga ng mga Barangay president nagsuroy kita ang kinahanglanon kaayo,” matud ni Lim.

Nagpasalamat usab si Kapitan Andrew “Ebod” Melliza sa Barangay Agusan nga usa iyahang barangay nga nakabenipisyo ug nakadawat og mga shredder machine.

Giingong mga anaa sa mokabat P80,000 ang kantidad sa mga bangka nga ginama sa fiber glass lakip na ang makina ug uban pa, samtang ang matag baka anaa sa P45,000 diin gitunol na usab sa nagkadaiyang barangay sa may distrito dos.