SAMA sa gilauman, grabe ka kulbahinam ang duha ka mga deciding Game 7 kagahapon sa National Basketball Association (NBA) 2019 Playoffs apan ang makasaysayon ug nakapadaog nga buzzer-beater nga puntos ni Kawhi Leonard sa host Toronto Raptors maoy miilog sa labing dakong atensyon.
Si Leonard miitsa sa kilid nga bahin atubangan sa depensa ni Joel Embiid dungan sa pagkapupos sa oras aron agakon ang Raptors ngadto sa kadaugan batok sa Philadelphia 76ers, 92-90, sa Eastern Conference finals.
Sa kasaysayan sa NBA, kini maoy labing unang higayon nga nagdaog ang usa ka Game 7 sa usa ka buzzer-beater.
Ang Raptors mao ang nakaangkon sa katungod sa pagpakigbatok sa Milwaukee Bucks alang sa Eastern Conference finals best-of-seven series
“It was great,” matod ni Leonard. “That’s something I never experienced before, Game 7, a game-winning shot. It was a blessing to be able to get to that point and make that shot and feel that moment.”
Human natabla ni 76ers guard Jimmy Butler ang duwa, 90-90, sa nahabiling 4.2 segundos, ang Raptors migamit sa katapusan nilang timeout aron paghan-ay og set play nga gituyo alang kang Leonard.
Si Leonard midala sa bola paingon sa kilid nga bahin dayong itsa unya ang nakapakulbahinam og samot, katulo pa miuntol ang bola sa ring una kini nasulod ug human niini, miulbo na ang kasadya sa mga dumadapig sa Raptors.
Gipangulohan ni Leonard ang kadaugan pinaagi sa iyang 41 puntos gikan sa 16-of-39 shooting.
“He was awesome at both ends,” matod ni Raptors coach Nick Nurse kabahin kang Leonard. “That’s his uniqueness. Not only can he get you 30 and anywhere upwards from that, but there’s moments when he can just decide you’re not scoring, either.”
Si Embiid, kinsa maoy nangulo sa 76ers pinaagi sa iyang 21 puntos, naghilak nga migawas sa korte.
Trail Blazers 100, Nuggets 96
Sa Denver, munasginhawa sab nga gibuntog sa Portland Trail Blazers ang host Nuggets aron pag-abante sa Western Conference finals.
Ang Trail Blazers maoy mopas-an sa usa ka malisod nga tahas sa pagpakigbatok sa back-to-back defending champion Golden State Warriors alang sa Western Conference finals.
Si Damian Lillard igo lang nakamugna og 13 puntos sa 3-of-17 shooting apan gilangkuban kini og duha ka krusyal nga threee-pointers nga naghatag sa Trail Blazers og 81-76 ug 92-85 nga labaw.
Gipangulohan ni CJ McCollum ang kadaugan sa Trail Blazers pinaagi sa iyang 37 puntos.
“It’s a luxury to have two guys like that who can find different ways to score in different ways,” asoy ni Blazers coach Terry Stotts. “CJ does it one way, Dame (Lilllard) does it in another. On a night when Dame struggled shooting the ball CJ came up big.” (AP, ESL)