KUMUSTA ang resulta sa piniliay kagahapon? Gisulat ko kining akong kulom sa buntag sa adlaw’ng Lunes aron moguwas sa Martes busa wala pa ako masayod sa resulta.
Manghinaut ako nga malinawon kini ug atong gibotohan ang kandidato nga angayan sa puwesto ug dili kadtong nanghatag ug suburno.
Gibalita nga may mga lugar sa Mindanao nga tag P5 hangtud sa P10 mi ang gihatag sa matag usa ka botante. May gamay daw nga lungsod sa Surigao nga gidagsa sa mga turista nga kusog ang pinalitay og boto.
Sa laing bahin, gawas sa tikas sa eleksiyon, ang piniliay mao ang panahon nga mapadayag sa katawhan ang ilang sentimento sa mga panghitabo sa palibot.
Kung nakaangay sila sa ilang kasamtangang opisyales, nan panahon kini nga ilang botohan aron mopadayon o kung dili, aron pulihan og lain.
Dinhi nato makita ang katag kung epektibo ba ang ilang dugay nga pangampanya og mahalon nga ads sa TV, pamantalaan or radyo.
Karon ra nga eleksiyon nga minus ang pagharong sa mga kandidato kay nagkanya-kanya man ang diskarte. Subay sa akong nasayran usa ka semana na lang una ang adlaw sa eleksyon, medyo nabatian na sa oposisyon nga Otso-Diretso nga tagilid sila batok sa Hugpong ng Pagbabago ni Mayor Inday Sara.
Kanunay sab silang iwit sa gipagula nga survey ug hataas kaayo ang “approval rating” sa administrasyon ug sa pangulo nga maoy puntirya sa ilang kampanya.
Para kanako, wala ma-konek sa Oto Diretso ang ilang kampanya sa sentimento ug panginahanglan sa tawo mao nga tagilid sila sa bugnong lugaynon.
Usa ka ehemplo niini mao ang isyu kabahin sa China. Mangutana ang yanong lungsuranon nga kung ugaling mopagahi ang China sa ilang posisyon, kaya bang giyerahon sila sa Pilipinas nga buot buhaton sa oposisyon?
Usa sab ka timailhan sa ilang pagtagilid mao ang tabang nga gihanyag sa simbahang Romano Katoliko nga gipadayag ni Antonio Cardinal Tagle, ang arsobispo sa Manila.
Karon ra nahitabo human sa EDSA Revolution ni Cardinal Sin nga dayag nga nisuporta ang simbahan sa oposisyon.
Usa sa mga dakong kritiko sa pamunoan ni PRody Duterte mao ang simbahan ilabi na sa isyu sa “extrajudicial killings” ug abuso sa tawhanong katungod ubos sa “war on drugs” niini.
Kulang na lang nga nganlan ug itaas ang kamot sa cardinal ang mga kandidato sa Otso Diretso nga gusto niyang pabotohan sa mga katoliko.
Apan nakapangutana ako kung aduna bay “Catholic vote”? Nahimong tradisyon sa simbahan nga dili modapig sa bisan kinsang kandidato sa panahon sa eleksiyon, hinunua gamiton nila ang ilang salabutan ug tanlag aron botohan ang anaa sa ilang kasingkasing.
Dili kini pareha sa Iglesia ni Cristo nga adunay lig-on nga “unity vote.” Posibleng adunay mosunod sa cardinal apan dili kini sarang nga makapausab sa sulod sa kasingkasing sa tawo.