Suporter sa politiko gipatay

DIGOS CITY -- Patay gilayon ang usa ka giingong suporter og kandidatong mayor human gipusil, banda ala 1:55 sa hapon Dominggo, Mayo 12, usa ka adlaw una ang 2019 midterm elections.

Si Lt. Col. Deozar Almasa, city police director, nag-ila sa biktima nga si Omar Payan Jamad, 28, molupyo sa Purok Talisay, Sitio Punta Bi-ao, Barangay Cogon.

Sumala ni Almasa nagtagay og ilimnong makahubog ang biktima bisan sa liquor ban, samtang didto sa balay ni Freda Sinoy, kuyog ang laing upat ka mga silingan.

Nasayran nga kalit miduol ang nag-inusarang suspek ug way daghang rason, gipusil si Jamad gamit ang wa matinong kalibre sa arnas.

Gitataw ni Almasa nga nahiagom ang biktima og samad pinusilan sa tuong bahin sa nawong nga milapos sa walang bahin sa liog hinungdan sa iyang kamatayon. Sumala sa mga molupyo sa lugar nga iladong suporter ni Board member Nonito Llanos III, kinsa nagpapili nga mayor ilawom sa partidong Hugpong ng Pagbabago (HNP), ang biktima.

Apan, usa ka tinubdang pulis ang nagbutyag nga anaa sa drugs watch list ang biktima.

Hinuon, di pa masulti sa kapulisan kon unsay motibo sa pagpusil sa biktima apan padayon ang imbestigasyon. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph