DUHA ka granada ug improvised explosive device (IED) ang gipabusikad sa managlahing lugar sa Maguindanao Province.
Unang gilabayan og granada ang likod nga bahin sa Municipal Hall sa Datu Odin Sinsuat sa probinsiya, 1:35 sa kaadlawon Lunes, Mayo 13.
Ug gisundan kini sa lain pang pagpabusikad sa granada sa merkado publiko sa maong lungsod.
Samtang alas 7:12 sa buntag sa maong adlaw, nibuto sab sa IED sa Datu Saudi Ampatuan sa mao gihapong probinsiya.
Walay gitaho nga naangol sa mga pagbusikad.
Sa pikas bahin, duha sab ka mga bala sa 40mm o M-79 grenade launchers ang nibuto sa bakanteng luna sa Purok Omar Malagapas, Barangay Rosary Heights 10 sa siyudad sa Cotabato.
Nahitabo ang pagbusikad alas 10:15 sa gabii, Dominggo, likod sa City Hall compound, una ang eleksiyon kagahapon.
Hinuon gitaho ni Cotabato City Police Office director, Colonel Michael Lebanan nga way naangol o namatay sa pagbusikad apan grabe ang gibating kalisang ug kahadlok sa mga molupyo sa maong dapit.
Gituohan nga ang pagbusikad gitumong aron nga hadlukon ang mga molupyo aron nga di na moboto sa eleksiyon Lunes. (Edgar E. Fuerzas)