SA KINATIBUK-AN, nahimong hapsay ug walay mga dagkong panghitabo nga natala sa kwerpo sa kapulisan atol sa 2019 midterm elections sa Davao City ug sa tibuok Davao Region, adlaw’ng Lunes, Mayo 13.
Kini ang gibutyag sa mga tigpamaba opisyal sa Davao City Police Office ug sa Police Regional Office (PRO)-Davao human ilang nakab-ot ang gitingoha nga kalinaw atol sa pagpahigayon sa midterm elections.
Sumala sa kapulisan, nakab-ot nila ang gitinguha human sa pakig-alayon sa kasundalohan ug sa Task Force Davao ingon man ang kooperasyon sa katawhan sa mga balaud nga ilang gipatuman.
Sa liquor ban, tulo ka mga lalaki ang gisikop sa mga personahe sa kapulisan human naaktuhi nga nag-inum bisan og gipatuman ang Comelec liquor ban didto sa Davao Farms Southbay, Barangay Lapu-Lapu, Agdao, Davao City.
Subay sa report gikan sa PRO-Davao, mokabat 17 ka mga operasyon ang gipahigayon sa tibuok rehiyon diin moihap sa 67 ang mga nasikop.
Sa giingong vote buying, nagbansiwag niini ang Davao del Norte diin dunay na-report nga walo ka mga kaso ug dunay duha nga gipangdakop.
Sa election-related-violence incident, nanguna niini ang Davao del Norte Provincial Police Office (DNPPO) nga dunay tulo ka mga kaso didto sa Asuncion, Talaingod, ug Braulio Dujali, samtang tulo sab ka kaso sa Davao Oriental Provincial Police Office (DOPPO) diin duha ang sa San Isidro ug usa ang natigayon sa Lupon.
Sa kinatibuk-ang peryod sa eleksyon, dunay mokabat 318 ka mga armas ang natahan ug 203 armas ang nakumpiska.
Tungod niini, mapasalamaton ang otoridad sa resulta sa paningkamot nga makab-ot ang kalinaw sa 2019 midterm elections. (Jeepy P. Compio/Richy F. Nalagon)