NAHIBAWO ba mo nga ang 30 seconds nga TV ad sa ABS-CBN mokabat sa P900k sa non-primetime ug P1.4 million sa primetime shows?
Sa kadaghang political ads nga nibaha sa telebisyon sa miaging pila ka buwan unsaon kaha to pagbawi sa mga kandidato ang ilang nagasto no nga ang suweldo sa senador mokabat ra man sa P117k ang buwan.
Ang ilang katarungan kay daghan sila og mga donor ug financial supporter. Ay mao na’y nakaparat kay makautang sad sila og kabubut-on.
Mahibong sad ka ba kay bisan sa isyu nila sa corruption pasok gihapon sila sa mga survey.
Base sa pagtuon sa Harvard ang mga Pinoy kuno ang giilang “most gullible people in the world.” Ang buot ipasabot nga dali rang ilaron.
Ang news website nga “Indy100” niingon sad nga base sa survey, ang Pilipinas ang ikatulo nga nasud sa kalibutan nga “most ignorant on their nation’s key issues.”
Motuo mo ani? Ambot pero kon nakabantay mo ang atong pulitika maora sad og showbiz. Kay maorag nahug siya nga popularity contest.
Nakabasa o nakadungog man tingali mo nga dunay mga pulitiko nga moduol og mga artista aron padaganon sila ubos sa ilang partido.
Mismo silang Dingdong Dantes ug Vice Ganda niangkon nga gikumbinsir sila nga modagan sa karon nga eleksyon. Pero ilang gibalibaran sa managlahing rason. Natural nganong modagan man sila nga mas dako man silag kita sa showbiz.
Usahay bitaw sa kadaghang fake news karon di na ta kasabot kon asa’y tinuod ani. Hasta gud ang TV host nga si Gretchen Ho ug Olympic medalist nga si Hidilyn Diaz naapil na sa matrix.
Sa ka high tech na karon sa panahon dapat gyud tang magmatngon ug magmabinantayon.
Sa katiguwangan pa, way mangingilad kon way magpailad. Maayo unta!