SUKWAHI sa kabalaka ug panglantaw sa mayor niadtong wala pa ang piniliay nga posibleng magubot ang pagpahigayon sa eleksiyon dinhi sa dakbayan, nahimo kining malinawon. Walay dakong panghitabo nga sarang nakapabalda sa eleksiyon. Sa wala pa ang piniliay, mitumaw ang mga kagubot sama sa pagpangrakrak sa mga panimalay sa mga kapitan nga kaalyado sa Bando Osmena Pundok Kauswagan (BOPK), pagpang-terorismo sa iyang mga supporters didto sa kabukiran, pagsunog sa sakyanan sa iyang kaalyado nga kapitan ug ang pagpang-ronda sa mga panimalay sa iyang mga kaalyado.
Mao man gani ang hinungdan nga iyang giawhag ang Commission on Elections (Comelec) nga ipaubos sa Comelec control ang dakbayan sa Sugbo. Iyang gitumbok ang kapulisan nga maoy nagpaluyo sa maong mga pagpangataki sa iyang mga kaalyado. Apan gumikan ba kaha sa kaapeki sa panahon o ba kaha walay igong basihanan ug sukaranan, wala kini ma-aksiyoni sa Comelec.
Pero sa koluoy sa Diyos, walay bayolente nga nahitabo. Naratol lang siguro siya gumikan kay wala naman niya makontrolar ang kapulisan. Sa miaging mga eleksiyon nga hinawiran sa liog niya ang director sa Cebu City Police Office (CCPO), aw, siya usab ang mimando sa kapulisan nga i-harass ang mga supporters sa iyang mga kaatbang.
Malinawon tuod ang piniliay, apan ang pangutana kon honest ba? Wala kahay mga binoang nga gihimo ang nga pulitiko aron lang sila magmadaugon? Daghan kitang nadunggan nga vote buying nga gihimo sa matag pikas nga kampo. Apan pipila lang ang nadakpan. Ang mga sakop sa Sangguniang Kabataan sa Barangay Cogon Ramos nga nagpasiugda og basketball tournament gipangdakop sa mga pulis kay nahilambigit nag-vote buying daw. Si Konsehal Jerry Guardo sa BOPK, gitumbok nga maoy namalit og boto nga gipaagi lang sa sports tournament ug sa mga SK members. Apan gipanghimakak kini ni Guardo. Pero dakong kantidad ang nakompiskar sa mga pulis. Nakahigda gyud tawon og detention cell ang maong mga batan-on. (bobbygnalzaro@gmail.com)